Ikigo cy’Imisoro n’Amahoro (RRA) cyiributsa abacuruzi bishyura mu bihembwe ko igihe ntarengwa yo kwishyura igihembwe cya 4 cy’ipatanti cyegereje, kuko iyi gahunda izarangira ku wa Kane tariki ya 31 Ukwakira 2024.
Umusoro w’ipantanti ucibwa ku bikorwa by’ubucuruzi bikorera mu turere, ukishyurwa hashingiwe ku gicuruzo umucuruzi yagize mu mwaka, igishoro ku bacuruzi bashya cyangwa se imirimo bakora.
Umusoro w’ipatanti ku muntu wahisemo kwishyura umwaka wose wishyuwe bitarenze tariki ya 31 Mutarama, mu gihe hari n’abandi bahisemo kwishyura mu bihembwe bine bizarangirana na tariki ya 31 Ukwakira.
Komiseri Wungirije ushinzwe Intara n’Imisoro yeguriwe Inzego z’ibanze, muri RRA, Ernest Karasira yabwiye abaturage ko ukwezi kwa cumi ariko bagomba kumenyekanishamo no kwishyura igihembwe cya nyuma cy’ipatanti.
Akomeza avuga ko abacuruzi bakwiye gukangukira kuzuza izi nshingano, kuko ipantanti ubu yorohejwe aho umuntu ufite ubucuruzi bufite n’andi mashami mu turere yishyura igikorwa kimwe.
Itegeko rigena ko umwaka w’imisoro ari amezi 12, mu gihe abatangiye ibigo bito n’ibiciriritse basonerwa igihe kingana n’imyaka ibiri, naho ufite ibikorwa by’ubucuruzi biri mu turere dutandukanye yishyurira ipatanti buri gikorwa, mu gihe iyo biri mu karere kamwe n’icyicaro gikuru habarwa ipatanti hagendewe ku kicaro gikuru.
RRA ivuga ko umaze kumenyekanisha umusoro ahabwa nimero yo kwishyuraho hakoreshejwe uburyo butandukanye bwo kohereza amafaranga, mu gihe usora atawumenyekanishije cyangwa ntakurikize igihe cyagenwe yishyura uwo musoro agacibwa n’izahabu ihwanye na 20% y’umusoro wagombaga kwishyurwa.
Uwagombaga gusora akarenza 30 kw’itariki yagenwe yishyura 40% by’umusoro yagombaga kwishyura, mu gihe iyo yarengejeho iminsi iri hagati ya 31 ariko itari hejuru ya 60 yishyura 60% y’u musoro yagombaga kwishyura.
