Urwego Ngenzuramikorere, RURA, rwatangaje ko rugiye gutangira kugerageza uburyo butari busanzwe bwo kwishyura hagendewe ku rugendo umugenzi yakoze, aho kwishyura amafaranga ahwanye n’urugendo rwose.
Ni itangazo RURA yashyize hanze kuri uyu wa mbere, tariki ya 2 Ukuboza 2024, yifashishije imbuga nkoranyambaga zayo, yatangarije Abanyarwanda bose by’umwihariko abakora ingendo mu modoka rusanjye ko igiye gutangira igerageza ry’u buryo bushya bwo kwishyura urugendo.
RURA yatangaje ko guhera tariki ya 4 Ukuboza 2024, hazatangira gahunda yo kwishyura hakurikijwe urugendo umuntu yakoze, aho kwishyura amafaranga ahwanye n’urugendo rwose.
Umugenzi azajya akoza ikarita y’urugendo ku mashini yinjiye nk’uko bisanzwe, nagera n’aho aviramo yongere ayikozeho asoze urugendo, mu rwego rwo kwirinda kwishyura urugendo rwose.
Iyi gahunda izatangirira mu muhanda Nyabugogo-Kabuga na Downtown-Kabuga, ndetse abakozi ba RURA n’abu Mujyi wa Kigali bazajya baza muri gare no ku byapa bareba uko iri gerageza rigenda.
