Sosiyete Nyarwanda ikora ubwikorezi bwo mu Kirere (RwandAir) yatangaje ko yagizweho n’ingaruka n’imyigaragambyo y’abakozi yabereye ku kibuga cy’Indege Mpuzamahanga cyitiriwe Jomo Kenyatta (JAKIA).
Iyi sosiyete yavuze ko indege ya WB453 yagombaga guhaguruka i Nairobi Saa 12:10, yashyizwe Saa 20:50.
Urugendo rw’indege ya WB402 yagombaga guhaguruka i Kigali Saa 17:30, ikagera i Nairobi Saa 20:10, rwo rwasubitswe.
Hari hateganyijwe kandi urugendo WB403, rw’indege yagombaga kuva i Nairobi Saa 20:50 ikagera i Kigali Saa 21:30. Abagenzi bo muri iyi ndege bashyizwe mu ikora urugendo WB453.
RwandAir yihanganishije abagenzi bagizweho ingaruka n’ibyabaye , ibizeza ko bari kubikurikemura.
Yagize iti ” Amakipe yacu arimo gukurikiranira hafi imiterere y’ikibazo kandi turimo gukorana mu kugabanya ingorane ari na ko dufasha abagezweho n’ingaruka. Abakiriya barashishikarizwa kuvugisha ibiro byacu by’ubucuruzi ngo bafashwe.”
RwandAir yavuze ko iki cyemezo gishingiye ku bushyamirane bo mu bakozi bo ku kibuga cy’indege i Nairobi muri Kenya, nk’uko byatangajwe n’Ikigo gishinzwe iby’indege muri iki gihugu (Kenya Airports Authority, KCAA).
Mu cyumweru gishize Ihuriro ry’abatanga serivisi zijyanye n’ubwikorezi bwo mu kirere ryo muri Kenya, ryatanze integuza y’iminsi irindwi ko abarigize bazakora imyigaragambyo itewe n’imicungire bavuga ko ari mibi y’uru rwego.
Iyi nteguza yaje nyuma y’uko abagize iri huriro bagerageje kugeza ibibazo bafite bijyanye n’imiyoborere mu kazi kabo kuri KCAA, ariko ntiyagira icyo ibikoraho.
