Leta y’u Rwanda yongereye serivisi nshya z’ubuvuzi 14 mu zivurwa hakoreshejwe ubwisungane mu kwivuza, mituweli, mu gukomeza gufasha Abanyarwanda kubona ubuvuzi bufite ireme.
Iki cyemezo cyatangarijwe mu Nama y’Abaminisitiri yateraniye muri Village Urugwiro ku mugoroba wo ku wa Gatanu, tariki ya 17 Mutarama 2025.
Ubwishingizi bwa mituweli busanzwe bukoreshwa n’Abanyarwanda bagera kuri 92%, bwongerewemo serivisi 14 z’ubuvuzi zirimo ubuvuzi bwa kanseri, umutima, kuyungurura amaraso no gusimbuza impyiko, kubaga hakoreshejwe ikoranabuhanga n’ibijyanye n’insimburangingo n’inyunganirangingo.
Biteganyijwe ko muri Kamena 2025, izi serivisi nshya zizaba zatangiye kuvurwa hifashishijwe mituweli.
Mu zindi mpinduka z’ingenzi zakozwe harimo kugabanya ibiciro kuri serivisi z’ubuzima zo ku rwego rwisumbuye hagamijwe kujyanisha ibiciro n’igihe.
Ibiciro bigenderwaho ni ibyaherukaga kuvugururwa mu 2017 ku buryo bitari bikijyanye n’ikiguzi nyacyo cy’ubuvuzi.
Itangazo rya Minisiteri y’Ubuzima rivuga ko ishoramari Leta y’u Rwanda yashyize mu bikoresho by’ikoranabuhanga n’imiti ‘rigomba kujyana n’igabanuka ry’ibiciro kuri izo serivisi.’’
MINISANTE yavuze ko ibiciro byajyanishije n’igihe aho kuri ubu igiciro cyo guca mu cyuma [CT Scan] k’ufite mituweli cyavuye kuri 45.000 Frw kigera kuri 16.283 Frw mu gihe umurwayi azajya yishyura 1628 Frw [10%].
Ku biciro byajyanishijwe n’igihe, icyo kubyarira kwa muganga ku muntu utabazwe ni 27.944 Frw. Ufite mituweli azajya yishyura 1126 Frw avuye kuri 926 Frw mu gihe ubwishingizi bwishyura 11.261 Frw.
Muri izi mpinduka kandi, hashyizweho ibiciro byihariye ku baturuka muri Afurika y’Iburasirazuba n’abo mu bindi bihugu.
Minisiteri y’Ubuzima yatangaje ko ibiciro bya serivisi z’ubuzima bizajya bivugururwa buri myaka ibiri kugira ngo bijyanishwe n’igihe.
Minisiteri y’Ubuzima ku bufatanye n’Urwego rw’Ubwiteganyirize mu Rwanda, RSSB, rwatangije uburyo bushya bwo guha amavuriro mato amafaranga yo kugura imiti n’ibikoresho mbere.
Ubu buryo buzatangirira mu Burasirazuba ariko bugende bwagurirwa no mu bindi bice by’Igihugu, bwitezweho gukemura ikibazo cy’abagorwaga no kubona imiti cyakunze kugaragazwa n’amavuriro mato.
