U Rwanda rwatangije uburyo bushya bwo kurwanya virusi itera SIDA binyuze mu gutera umuti mu rushinge, rimwe mu mezi abiri. Uyu muti ugabanya ubukana bw’iyi virusi mu mubiri w’umuntu udasanzwe uyanduye, ariko bigatandukana no kwitwa urukingo rwa virusi itera Sida.
Ikigo cy’u Rwanda cyita ku Buzima, RBC, cyatangaje ko umuti wo mu rushinjye uje kunganira ibinini bya ‘PreP’, byari bisanzwe bihabwa abari mu byago byo kwandura virusi itera Sida kurusha abandi, barimo abaryama bahuje ibitsina, ababana badahuje ibisubizo, abakora umwuga w’uburaya n’abandi bari mu byago.
RBC yasobanuye ko uyu muti uterwa binyuze mu rushinge ufite izina rya ‘Cabotegravir’, uzajya ukora mu buryo bwo guca intege virusi itera Sida mu mubiri w’utarayandura, bitandukanye no kuba ari urukingo rwa Virusi itera Sida.
Umwihariko w’urushinjye rwa ‘Cabotegravir’ ruzajya ruterwa mu mubiri w’umuntu rimwe mu mezi abiri mu gihe cyose ari mu byago byo kuba yakandura Sida, aho kuba wafata ikinini cya ‘PreP’ gitangwa buri munsi.
RBC yatangaje ko iyi gahunda izatangira gukorerwa mu bigo bibiri byo mu mujyi wa Kigali, ariko hakaba hari kugeragezwa uburyo bwo kuyigeza mu gihugu cyose.
Umuti wa Cabotegravir wemewe n’Ishami ry’Umuryango w’Abibumbye ryita ku Buzima, OMS mu 2022, hagamijwe gukumira ubwandu bushya bwa virusi itera Sida.
