U Rwanda n’Abanyarwanda batashywe n’inkuru nziza y’uko Ishami ry’Umuryango w’Abibumbye rishinzwe Uburezi, Ubumenyi n’Umuco (UNESCO), ryashyize Intore z’u Rwanda ku rutonde rwu murage ndangamuco udafatika w’Isi.
Ni ibyo UNESCO yatangaje ku wa kabiri, tariki ya 3 Ugushyingo 2024, mu Nteko rusange ya 19 y’Akanama gashinzwe kubungabunga umurage udafatika, irimo kubera muri Paraguay.
Inzobere mu by’umuco akaba n’Umujyanama w’Umunyamabanga wa Leta muri Minisiteri y’Urubyiruko n’Iterambere ry’Ubuhanzi, Ruzindana Rugasaguhunga, yifashishije urubuga rwa X, asobanura igituma Intore z’u Rwanda tuzirebesha amaso ariko zigashyirwa mu murage ndangamuco udafatika.
Yasobanuye ko mu busanzwe igihugu kigira umuco wacyo, ariko uwo muco iyo usesenguye neza usanga utawufatisha amaboko cyangwa ibiganza ngo uwuhereze uwo mwicaranye.
Nubwo atari umuco ufatishwa ibiganza, ariko ni umuco turinda, tukawukomeraho, ndetse tukawuraga abadukomokaho, ukaba umuco w’uruhererekane udacika.
Umurage w’Intore zihamiriza nawo tuwusanga muri uyu muco, nawo ntufatika ariko uriho. Iyo Intore ziyerekana mu mbyino gakondo zihamiriza, ziba zihamiriza ibivuye mu bwenge no mu mutima. Ntabwo bifatika ariko bigaragarira ubireba.
Ruzindana Rugasaguhunga yasobanuye ibintu bitanu UNESCO ikurikiza ivuga ko Umurage Ndangamuco runaka udafatika, aribyo; Uruhererekane nyemvugo, Imyiyereko gakondo, Imigenzo, imihango n’ibirori gakondo, Ubumenyi n’imigenzereze ku bintu karemano n’Ubumenyi bushingiye ku bugeni n’ubuhanzi gakondo. Kandi ibi byose koko ntibifatika.
Ku ruhande rw’u Rwanda, kuba Intore zashyizwe ku rutonde rw’umurage Ndangamuco udafatika wa UNESCO, bizatuma uhita utangira kumenyekanishwa ku rwego rw’Isi.
Sibi gusa, kuko uzahita utangira kurindwa ku rwego mpuzamahanga, wongere uburemere mu gukurura ba mukerarugendo, abakozi bashinzwe kuwubungabunga bahugurwe na UNESCO, ndetse izahita itangira gutera inkunga imishinga y’iterambere iwushamikiyeho binyuze mu Kigega cya UNESCO.
Ibi bisobanura ko uwariwe wese wagira umushinga ugendanye no kwigisha no kubungabunga imihamirizo y’Intore cyangwa uyu murage, yatizwa amaboko na UNESCO.
