Umunyarwenya, umukinnyi wa filime, ndetse akaba n’icyamamare mu biganiro bya Televiziyo muri Leta Zunze Ubumwe za Amerika, Steve Harvey, yatangaje ko yifuza kubyaza umusaruro amahirwe y’ishoramari ari mu Rwanda mu rwego rwo guha imirimo urubyiruko, kuko arirwo rugira uruhare mu iterambere ry’igihugu.
Steve Harvey umaze iminsi mu Rwanda aho yitabiriye n’itangwa ry’ibihembo bya FIA, yagiranye ikiganiro cyihariye na RBA, ku Cyumweru, tariki ya 15 Ukuboza 2024, asobanura u Rwanda nk’igihugu cy’ikitegererezo, ukurikije amateka cyabayemo mu myaka 30 ishize, naho kiri uyu munsi.
Ati” Kuba mwarabashije kurenga ibi ni ikimenyetso cy’abantu muri bo uyu munsi, Ni ikimenyetso cy’ubuyobozi bwiza mufite. Mbabwije ukuri muri abantu bihariye, ahubwo abandi bajye baza kubiogiraho, bamenye igososobanuro cy’ubugwaneza, kubabarira n’urukundo.”
Steve Harvey ufite izina rikomeye ku Isi byumwihariko muri Leta Zunze Ubumwe za Amerika, yavuzeko we n’ikipe ye bafite gahunda yo kuzana ibikorwa by’ubucuruzi mu Rwanda, bizatanga imirimo by’umwihariko ku rubyiruko.
Ati” Dufite byinshi byo gukora by’umwihariko hano mu Rwanda, aha ni ahantu hihariye ntekereza ko twahakorera ibikorwa by’ubucuruzi, kandi ni nabyo turimo n’ikipe yanjye hano, turi kugirango tubyaze umusaruro amahirwe y’ishoramari ahari, kuko ibyo bizafasha mu guhanga imirimo no kwitanga.”
Steve Harvey yavuze ko icyo bagamije ari ugutoza abato kumva neza umurongo wo kubyaza umusaruro amahirwe ahari, bakaboneramo imirimo yo gukora ndetse n’igihugu kingukuriramo muri rusanjye.
Yongeyeho ko Umugabane wa Afurika ufite amahirwe kuko abawutuye benshi ari urubyiruko, akaba ariyo mpamvu bakwiriye guhabwa amahirwe, ati” Sinjye wo gutekereza kuri ejo hazaza kuko nta gihe kinini nsigaje ariko nzi akamaro ko gufasha urubyiruko”, ahamya ko urubyiruko rufite ibitekerezo bya kwifashishwa mu guhanga udushya.
Steve Harvey kuri ubu ufite imyaka 67 azwi cyane mu biganiro bya The Steve Harvey Morning Show, Family Feud, Judge Steve Harvey n’ibindi, ndetse niwe uyobora irushanwa rya Miss Universe kuva mu 2015.
