Umunyarwenya, akaba n’umunyamakuru uzwi cyane mu biganiro bya Televiziyo, Steve Harvey, yasuye urwibutso rwa Jenoside rwa Gisozi, agaragaza ko yababajwe n’amateka u Rwanda rwanyuzemo, ndetse yishimira intambwe imaze guterwa mu kwiyubaka.
Steve Harvey yagiriye uruzinduko rw’ibanga mu Rwanda, ndetse mu duce yagombaga gusura harimo Urwibutso rwa Jenoside rwa Kigali, aho yasobanuriwe amateka ya Jenoside yakorewe Abatutsi mu 1994.
Steve Harvey yazengurukijwe mu bice bitandukanye bigize uru Rwibutso, maze atanga ubutumwa asaba Isi kumenya ukuri kwa Jenoside yakorewe Abatutsi 1994.
Yagaragaje ko uruganda rwa sinema rwo muri Amerika abayemo igihe kinini rudashyira umuhate mu kugaragaza ukuri, ati “ Nk’uruganda rwa sinema rwa Hollywood ntirushishikajwe n’uko kuri kandi narubayemo igihe kirekire, ukuri si umwihariko wabo”.
Steve Harvey yasobanuye ko yatunguwe n’uburyo abantu barenga miliyoni bishwe mu minsi 100, ati” Sindiyumvisha mu by’ukuri ubukana byakoranywe ku buryo abantu barenga miliyoni bishwe mu minsi 100! Biteye ubwoba”.
Uyu munyarwenya yishimiye aho u Rwanda rugeze rwiyubaka nyuma y’ibihe bishaririye rwanyuzemo, ndetse yizeza inkunga ishoboka mu bushobozi bwe kuyitanga mu gukomeza iterambere ry’u Rwanda.
Steve Harvey w’imyaka 67, akomoka muri Leta Zunze Ubumwe za Amerika, akaba ari umunyarwenya, umukinnyi wa Filime, Umunyamakuru, umwanditsi ndetse n’umu Producer.
