Tariki 22 Mata 1994 ni umunsi wa 16 mu minsi 100 Jenoside yakorewe Abatutsi yamaze. Kuri uyu munsi leta y’abicanyi yari ikomeje umugambi wayo mubisha wo gutsemba Abatutsi mu bice bitandukanye hirya no hino mu gihugu.
Abatutsi bahungiye kuri Komini Huye baturutse muri amwe mu makomini ya Butare byegeranye na Huye nka Mbazi, Maraba, Ngoma na Matyazo mu mujyi wa Butare ndetse na Gikongoro. Abapolisi n’abasirikare bahagose iminsi itatu yose, amazi bayaciye ntawe ujya kuvoma, babicisha inyota n’inzara.
Uwo munsi hishwe Abatutsi barenga ibihumbi mirongo itatu na bitanu (35,000), bamwe babatwikishije essence bahinduka umugina w’ivu, ryayowe rirashyingurwa mu gihe cyo kubashyingura mu cyubahiro nyuma ya Jenoside. Ku rwibutso rwa Jenoside rwaho hashyinguye imibiri igera ku 42,008.
Uwo munsi Interahamwe zishe Abatutsi b’abagabo mu mpunzi zari zahungiye mu rugo rukuru rw’abapadiri bera ahitwa kuri Centre D’etudes De Langues Africaines (CELA), iherereye iruhande rwa Centre national de pastorale Saint-Paul munsi ya Kiliziya Ste Famille i Kigali.
Kuri uyu munsi kandi hishwe Abatutsi bari bahungiye kuri ‘monastère’ y’ababikira b’ababenedigitine i Sovu no kuri Centre de santé yabo. Umubikira wayoboraga iyo ‘monastère’, Mukangango Consolata (Soeur Gertrude) na mugenzi we Mukabutera Julienne (sœur Kizito) banze kubakira, ariko baranga binjira mu kiriziya ya monastère, abandi bajya kuri Centre de santé.
Abatutsi biciwe ku Gisagara, mu murenge wa Kansi. Abatutsi biciwe ku kiyaga cya Cyamwakizi. Abenshi babaga baturutse Nyaruhengeri, Huye, Nyaruguru, Nyamagabe n’utundi duce twa Gisagara.
Kuri uyu munsi mu 1994 Abatutsi bahungiye ku musozi wa Nzaratsi babanje kwirwanaho bakoresheje amabuye, imiheto n’ibindi bikoresho gakondo bikeya ariko nyuma baje kwicwa n’interahamwe.
Abatutsi biciwe ku musozi wa Bibare (Bunyonga), Kamonyi ndetse kuri iyi tariki Abatutsi benshi biviwe ku musozi wa Kabakobwa mu Karere Ka Huye.
