Intumwa y’u Rwanda n’iya Repubulika Iharanira Demokarasi ya Congo, RDC, zashyize umukono k’umasezerano ya gahunda yo gusenya umutwe w’iterabwoba wa FDLR, izagendana no gukuraho ingamba z’ubwirinzi z’u Rwanda.
Aya masezerano yasinywe ku wa mbere, tariki ya 25 Ugushyingo 2024, nyuma y’ibiganiro byahuje intumwa z’ibihugu byombi, aho u Rwanda ruhagarariwe na Minisitiri w’ububanyi n’Amahanga, Amb. Olivier Nduhungirehe na mugenzi we wa RDC, Therese Kayikwamba Wagner, n’uwa Angola, Tete António.
Aya masezerano yashyizweho umukono, akubiye mu nyandiko, yemeza ingamba zo gusenya umutwe wa FDLR, ubangamiye umutekano w’u Rwanda, zashyizweho n’inzobere mu iperereza z’ibihugu bitatu, ku wa 30 Ukwakira 2024.
Umuhuza wa Angola, Minisitiri w’Ububanyi n’Amahanga, Tete António, yashimiye impande zombi ku bw’iyi gahunda bemeranyije yo gusenya umutwe wa FDLR, izagendana no gukuraho ingamba z’ubwirinzi ku ruhande rw’u Rwanda.
U Rwanda ruri mu biganiro bya Luanda, hagamijwe gushaka ibisubizo by’umutekano muke uri mu Burasirazuba bwa RDC, byateje umwuka mubi hagati y’ibihugu byombi.
