Perezida Paul Kagame yatangaje kumugaragaro ko u Rwanda rwasabye ko rwazakira Isiganwa rya mbere rikomeye mu mukino wo gutwara imodoka, rya Formula One, ndetse ahamya ko ibiganiro hagati y’impande zombi birimo kugenda neza.
Kuri uyu wa gatanu, tariki ya 13 Ukuboza 2024, ubwo yatangizaga ku mugaragaro inama y’Inteko Rusanjye ya FIA, iri kubera muri Kigali Convection Center, yahamije ko u Rwanda rwamaze gusaba ko rwazakira Grand Prix ya Formula One.
Ati” Nishimiye gutangaza ku mugaragaro ko u Rwanda ruri gusaba kugarura isiganwa ridasanzwe ku Mugabane wa Afurika binyuze mu kwakira Grand Prix ya Formula One. Ndashimira Stefano Dominicale n’ikipe yose ya Formula One ku nzira nziza ibiganiro byacu birimo kugeza ubu.”
Perezida Kagame yatanze icyizere ko u Rwanda rushyize umutima kuri iyi gahunda, yongeraho ko u Rwanda rwashyize ishoramari rifatika mu bikorwa bya Siporo, atanga urugero ku bikorwa remezo bimaze kubakwa birimo BK Arena, Stade Amahoro n’ibindi.
Perezida Kagame yavuze ko iyo ibihugu bidasanzwe byakira amarushanwa akomeye biteye intambwe yo kubikora, ibitangazamakuru bitangira kubyibasira nkaho ibyakozwe ari bibi, avuga ko ari imyumvire idakwiye.
Ni nyuma y’uko, ku mugoroba wo kuwa gatatu, tariki ya 12 Ukuboza, Minisitiri wa Siporo, Richard Nyirishema na Perezida wa FIA, Mohammed Ben Sulayem, bagiranye ibiganiro bigamije kurebera hamwe amahirwe y’imikoranire hagati y’impande zombi mu guteza imbere umukino wo gusiganwa mu modoka mu Gihugu.
