Kuri uyu wa gatanu, tariki ya 20 Ukuboza 2024, Minisiteri y’Ubuzima yatangaje ko u Rwanda rwatsinze icyorezo cya Marburg nyuma y’amezi atatu yari ashize igaragaye mu gihugu, binyuze mu kubahiriza ingamba z’ubwirinzi zashyizweho n’iyi Minisiteri.
Ni mu kiganiro Minisiteri y’Ubuzima n’abahagarariye Ishami ry’Umuryango w’Abibumbye ryita ku Buzima, OMS, bagiranye n’itangazamakuru, kigaruka ku rugendo rw’u Rwanda mu gutsinda icyorezo cya Marburg.
Minisitiri w’Ubuzima, Dr Sabin Nsanzimana, yagaragaje ishusho y’uko byari bimeze iki cyorezo kigera mu Rwanda n’uko urugamba rwo guhangana na cyo rwagenze, ndetse avuga ko “Rwari urugendo rurerure ariko ubu tugeze ku iherezo rya Marburg.”
Yagaragaje ko muri uru rugamba hakozwe ibintu bitatu biromo gukumira ko abayanduye ibahitana , kugerageza uburyo bushoboka bwo kuyihagarika vuba itarakwirakwira, ndetse no kumenya aho yaturutse, aho byaje kumenyekana ko ari virusi iterwa n’uducurama two mu birombe twahuye n’abantu.
Minisitiri Nsanzimana yavuze ko nubwo icyorezo kirangiye ariko hazakomeza ingamba z’ubwirinzi, ndetse hazajya hakoreshejwe ikoranabuhanga mu gukurikirana uducurama ari natwo twazanye Marburg.
Ati” Ni nako kazi tuzakomeza gukora kugira ngo tumenye aho utwo ducurama tuba kuko turihuta cyane, tuzakoresha ikoranabuhanga rya GPS ku buryo dushobora kurishyira kuri utwo ducurama kugira ngo tumenye aho tujya hose. Iryo koranabuhanga rizatangira vuba.”
Umuyobozi w’Ishami ry’Umuryango w’Abibumbye ryita ku Buzima, OMS, mu Rwanda, Dr Brian Chirombo, yashimiye u Rwanda imbaraga rwashyize mu kurwanya Marburg.
Ati” By’umwihariko ndashima ubuyobozi bwiza bw’Igihugu n’Abanyarwanda muri rusange kuko bashyize imbaraga mu guhashya iki cyorezo cyari kibangamiye urwego rw’ubuzima, twarakirwanyije kandi byagezweho. Iyi ntsinzi ariko ntabwo ari iherezo, urugamba rurakomeje.”
Tariki 27 Nzeri 2024, ni bwo Minisiteri y’Ubuzima yatangaje bwa mbere ko mu Rwanda hagaragaye abantu banduye icyorezo cya Marburg, ndetse kuva icyo gihe inzego zishinzwe ubuzima mu Gihugu, Ishami ry’Umuryango w’Abibumbye ryita ku Buzima, OMS, n’abandi bafatanyabikorwa bahise batangira urugamba rwo guhashya iki cyorezo.
