Umuvugizi Wungirije wa Guverinoma y’u Rwanda, Alain Mukuralinda, yavuze ko nta Munyarwanda urahitanwa n’imvururu zakurikiye amatora yo muri Mozambique, ndetse ko Leta y’u Rwanda irakomeza gukurikirana Abanyarwanda bariyo binyuze muri Ambasade.
Hashize ibyumweru bitatu muri Mozambique habaye amatora y’Umukuru w’Igihugu. Mu cyumweru gishize Komisiyo y’Amatora yo muri iki gihugu yatangaje amajwi ya burundu yibyavuye mu matora, aho Daniel Chapo wari usanzwe ku butegetsi ariwe wegukanye itsinzi n’amajwi 70,67%.
Umunyarwanda Ndabarasa Theophil utuye muri iki gihugu yabwiye Televiziyo Rwanda ko nyuma y’amatora hahise haduka imvururu zagizwemo uruhare n’urubyiruko rwatumwe n’abatavugarumwe n’ubutegetsi.
Ati” Abatavugarumwe na Leta ntago babyishimiye, umwe muri bo yahamagariye urubyiruko kwigaragambya, hanyuma urubyiruko rwirara mu bikorwa remezo, rujya mu mihanda rurafunga, rutwika amapine, hanyuma rugerageza no kwiba no gusahura amaduka y’abanyamahanga.”
Umuvugizi Wungirije wa Guverinoma y’u Rwanda, Alain Mukuralinda yatangarije Televiziyo Rwanda ko kugeza ubu nta Munyarwanda urahitanwa n’izi mvururu, ndetse ko Leta y’u Rwanda izakomeza kwita ku Banyarwanda batuye muri iki gihugu binyuze muri Ambasade.
Ati” Niba dufiteyo Ambasade birumvikana ko nk’abantu baba bari aho ngaho ibintu bibera bafite amakuru bagomba kubwira abo bahagarariye ati “Mwitonde” hari imvururu. Ndumva ibyo Ambasade yakoze igomba kuburira Abanyarwanda byerekana y’uko ibakurikirana, ndetse ikabasaba kugirango bahane amakuru kugirango bibaye ngombwa igire icyo ikora.”
Alain Mukuralinda asobanura ko imvururu ziri muri Mozambique zitibasiye Abanyarwanda gusa ahubwo ari abahatuye muri rusanjye, akaba ariyo mpamvu Ambasade iba igomba gufata ingamba ku bantu bayo no kugira uruhare mu bibakorerwa.
Ndabarasa Theophil avuga ko hari ingamba zashyizweho na Ambasade y’u Rwanda zirimo gukangurira abaturage kwirinda kujya aho ibibazo biri kubera, gutaha mu masaha ya kare, gutangira amakuru ku gihe mu gihe hari uwahuye n’ikibazo.
