Kuri uyu wa Gatanu, tariki ya 28 Gashyantare, Tour du Rwanda 2025 yakomeje hakinwa agace ka Gatanu kavuye mu Mujyi wa Rusizi- Huye, gafite intera y’ibilometero 144.
Aka gace kakinwe n’abakinnyi 68, karangiye kegukanwe n’Umubiligi, Duarte Marivoet, ukinira Ikipe ya UAZ, akoresheje 4h05’01”.
Duarte Marivoet wamaze intera y’ibilometero bitatu bya nyuma ari imbere wenyine, yakurikiwe na Awet Aman (CMC), Fabien Doubey (Total Energies) na Brady Gilmore (Israel Premier Tech) yasize amasegonda 25.
Umunyarwanda wasoreje hafi ni Masengesho Vainquer (Team Rwanda) wabaye uwa cyenda asizwe amasegonda 29, akurikirwa na Manizabayo Eric ( Java-Inovotec) wabaye uwa 13 asizwe amasegonda 44.
Umufaransa Joris Delbove niwe ucyambaye umwambaro w’umuhondo, bitewe nuko akibarusha iminota itatu, itari gukurwamo n’amasegonda 25 Duarte yabarushize.
Tour du Rwanda izakomeza ku wa gatandatu, hakinwa agace ka gatandatu kava mu Karere ka Nyanza gasoreze kuri Canal Olympia, Kicukiro.
