Perezida Paul Kagame yatangaje ko umuntu adakwiye kwirata ko hari urwego yagezeho mu gihe abo ashinzwe gufasha nta kintu kigaragara yabagejejeho, ashimangira ko ntaho byaba bitaniye no kwibona cyangwa kwishyira hejuru.
Yabigarutseho mu ijambo yagejeje ku bitabiriye amasengesho yo gushimira Imana ibyiza yakoreye igihugu, yabereye muri Serena Hotel, ku wa 19 Mutarama 2025.
Hashize iminsi ku mbuga nkoranyambaga hakwirakwira amashusho y’Abanyarwanda biyambitse ubusa, abari gukora imibonano mpuzabitsina cyangwa abikinisha n’abanywa ibiyobyabwenge bitandukanye.
Perezida Kagame yagaragaje ko umuryango Nyarwanda wamaze kwangirika bitewe n’ibibazo by’urudaca bigaragara buri munsi, avuga ko biterwa n’uburangare bw’inzego z’ubuyobozi n’izindi zibifite mu nshingano zakagombye kubikemura, ariko zikaba zirebera.
Yavuze ko ibyinshi mu bibazo abibona muri raporo ahabwa za buri munsi no ku mbuga nkoranyambaga zitandukanye.
Yagize ati “Turasenya igihugu cyacu turebera ibidakwiye kuba bikorwa. Ubusinzi, ibiyobyabwenge, indwano z’urudaca zidashira. Mbibona muri raporo mpabwa.”
Yakomeje avuga ko ari ibibazo bikomeye kandi bigomba gushakirwa umuti mu maguru mashya.
Yakomeje avuga ko abantu badakwiye kujya birata ko ari ibitangaza kubera urwego bariho, ashimangira ko umuntu agirwa igitangaza n’ibyo yakoze bikagirira rubanda akamaro.
Yagize ati “Tugomba kuba dufite ibibazo mu buyobozi bwa Leta no mu bandi ntavuze. Hari ikibazo tugisuzume ntitukajye hanze gusa ngo tunyure hejuru y’ibintu ngo tube ibitangaza. Kuba igitangaza ubigirwa n’abo wafashije kuba ibitangaza.”
Avuga ko kuri we kumera neza k’umuntu byashingirwa ku bo yafashije kumera neza cyangwa kugira icyo bigezaho.
Perezida Kagame yavuze ko mu kuzuza inshingano, abayobozi bakwiye kuzirikana kwita ku kugabanya ibishobora guhungabanya Umuryango Nyarwanda.
