Umunyarwenya w’icyamamare muri Amerika, Steve Harvey, yishimiye guhura na Perezida Paul Kagame, ashimangira ko yatewe ishyaka n’imbaraga no kwicisha bugufi bimuranga.
Uyu munyarwenya amaze iminsi mu Rwanda mu ruzinduko rw’ibanga yahagiriye aho yagombaga gusura ibice bitandukanye, ndetse ku wa kabiri, tariki ya 19 Ugushyingo, yagaragaye yasuye urwibutso rwa Jenoside yakorewe Abatutsi mu 1994, rwa Gisozi.
Mu gitondo cyo kuri uyu wa gatatu, Steve Harvey yasangije abamukurikira ku mbuga nkoranyambaga ubutumwa agaragaza ko yishimiye guhura na Perezida Kagame afata nk’ikitegererezo.
Mu butumwa bwe yagize ati” Twagize amahirwe yo guhura no kuganira n’umuvandimwe wacu Perezida Paul Kagame, natewe ishyaka n’imbaraga no kwicisha bugufi bimuranga.”
Uyu munyarwenya yagaragaje ko Perezida Paul Kagame ari igihamya cyo kudacogora no kubabarira byatumye u Rwanda rwongera kwiyubaka nyuma yo kunyura mu bihe bikomeye.
Steve Harvey w’imyaka 67, akomoka muri Leta Zunze Ubumwe za Amerika, akaba ari umunyarwenya, umukinnyi wa Filime, Umunyamakuru, umwanditsi ndetse n’umu Producer.
Steve Harvey azwi cyane mu gutebya ariko anigisha urubyiruko n’ingo ibijyanye no kwihesha agaciro by’umwihariko mu gihe bari mu rukundo.
Steve Harvey yatangiye gutebya nk’umwuga mu 1980, kuri ubu akora ibiganiro bitandukanye birimo The Steve Harvey Morning Show, Family Feud, Celebrity Family Feud, Family Feud Africa, n’ibindi bitandukanye.
Uyu munyarwenya kandi yanditse ibitabo bine birimo n’ibyakorewe filime aribyo ‘Act Like a Lady’ cyasohotse muri 2009 na ‘Think Like a Man’ cyasohotse muri 2017.
