Umuyobozi mukuru wa NBA Africa, Madamu Claire Akamanzi yavuze ko siporo iri kuzamuka ku rwego ruri hejuru ku Mugabane wa Afurika, agaragariza abashoramari ko uru ruganda ruri kuzamuka kurusha ubukungu bw’Akarere, bityo hari amahirwe menshi yiterambere mu bashoramo imari.
Ni bimwe mu byo yagarutse mu kiganiro yagiranye na The New Times, aho yari yitabiriye inama ya ‘Africa Investment Forum’ yabereye i Rabat muri Morocco.
Claire Akamanzi uri ku buyobozi bwa NBA Africa kuva mu 2023, nyuma y’igihe gito avuye ku buyobozi bw’Urwego rushinzwe Iterambere, RDB, yagaragaje ko siporo ku mugabane wa Afurika iri kuzamuka ku buryo bugaragara ndetse abashoramo imari bafite amahirwe akomeye.
Ati” Uruganda rw’Imikino rwitezweho gukura ku gipimo cya 8% mu myaka iri imbere, ni ibipimo biri kuzamuka cyane kurusha ubukungu bw’Akarere. Bisobanuye ko hari amahirwe menshi mu bashora imari mu gice cya siporo.”
Claire Akamanzi yasobanuye ko kuva NBA yatangira gukorera muri Afurika imaze kugera mu bihugu bitanu aribyo South Africa, Kenya, Senegal, Nigeria and Egypt, bigaragaza ko muri Afurika hari amahirwe y’iterambere rya siporo.
Yakomoje kw’irushanwa rya Basketball African League (BAL), rigiye kuba ku nshuro ya gatanu, avuga ko ari kimwe mu bitanga icyizere ku hazaza heza ha siporo muri Afurika.
Ati” Ku nshuro ya mbere irushanwa rya Basketball Africa League, ryabereye mu muhezo kubera icyorezo cya Covid-19. Ku nshuro ya kabiri, mu BK Arena, abantu 45,000 ni bo baje kureba imikino, mu mwaka wakurikiyeho, haje abantu 70,000, mu mwaka ushize, haje abantu 120,000, kureba umukino imbona nkubone. Ibi bigaragaza uko urukundo rw’imikino rukomeje kwiyongera mu bantu!”
Akomeza avuga ko iyi mibare ikomeza no kugaragarira ku mbuga nkoranyambaga zabareba ibikorwa bya siporo, ndetse kuri ubu 15% ya miliyari zinjirira mu bukerarugendo zituruka mu bitaramo n’imikino, ari nako bigendana no kwiyongera kw’abaterankunga n’abafatanyabikorwa.
Claire Akamanzi yatangaje ko NBA ifite gahunda yo kubaka ibibuga by’imipira 1000 muri Afurika birimo 100 bizubakwa muri Kenya, ibisigaye bikazasaranganywa mu bihugu bya Afurika birimo n’u Rwanda, ibi bikazafasha kurushaho gukundisha abantu umukino wa Basketball.
Claire Kamanzi yasabye abifuza gushora Imari muri siporo ya Afurika, gufata umwanya wo kuyisobanukirwa no kureba amahirwe arimo, ndetse no kwigira ku bihugu byabashije kuyibyaza umusaruro, ati “ Ubundi winjire mu mwuga, ushoremo, ubisobanukirwe, kuko nutangira kubikora ntago uzasubira inyuma, kuko icyo siporo iri gukora ni ugutera imbere gusa.”
