Abanyeshuri ba Kaminuza y’u Rwanda Ishami rya Huye, baratangaza ko bamaze amezi atanu batagerwaho nta murandasi (Internet), kandi nyamara ubuyobozi bukaba bwarakomeje kubizeza ko ari ikibazo kizakemuka vuba none amaso akaba yaraheze mu kirere.
Umukundwa Lilian ukoresha urubuga rwa X yasangije ubutumwa kuri uyu wa gatanu, tariki ya 3 Mutarama 2024, by’umwihariko abaza Kabagambe Ignatius, umwe mu bavuga rikumvikana ariko akaba n’umuvugizi wa Kaminuza y’u Rwanda ishami rya Huye.
Yagize ati “ Mwiriwe Kabagambe Ignatius. Ni gute Kaminuza NKURU y’u Rwanda imara amezi arenga atanu itagira internet?
Dore uko ikibazo giteye, Twafunguye mukwa cyenda 2024 batubwiraga ko ikigo cyari cyarafunze, batubwiye ko nta mpamvu bari kugura Internet kandi abanyeshuri batiga.
Birakomeza”
Yakomeje agaragaza ko Ubuyobozi bwa Kaminuza bwakomeje kubizeza ko mu gihe gito ikibazo kizaba cyakemutse, hagacaho ukwezi kwa mbere, kugeza ubwo amezi abaye atanu bikiri bityo.
Mu butumwa bwe, Umukundwa Lilian avuga ko ikibazo cyo kuba badafite murandasi kitari mu gice kimwe, ahubwo ari mu kigo hose, ati” Mu by’ukuri,birababaje ko no kugera muri Library nta internet ibamo ndetse yewe na Innovation hub. Nukuvuga ko nta hanu na hamwe hari internet muri Kaminuza yose(Huye Campus).
Kaminuza y’u Rwanda yaje gusubiza kuri ubu butumwa ivuga ko hari hamwe na hamwe iyi internet iboneka ariko ko hakiri kubakwa ibikorwa remezo bizafasha mu kuyihutisha.
Ubutumwa bugira buti” Mu gihe ukeneye internet yihuta wajya muri KOICA building cyangwa se muri Library. Kuri ubu turimo kubaka bimwe mu bikorwaremezo bigamije kongera umuvuduko wa internet no mu bindi bice byose bya Campus.”
Umwe mu banyeshuri b’iyi Kaminuza witwa Shema Gabriel wiga mu mwaka wa gatatu, yaganiriye na Umunota.com avuga ko iki kibazo gihari koko, ati” Internet ihari ni nkeya cyane, ntago wavuga ngo ntayihari burundu, ariko ihari ni nkeya ntago igera ahantu hose.”
Yakomeje avuga ko ubwo bimurirwaga muri Kaminuza y’u Rwanda, umwaka ushize basanze iri kuvugurwa. Ubwo bavaga mu biruhuko basanze murandasi itagikora (Ibyo Umukundwa agira ati” batubwiye ko nta mpamvu bari kugura Internet kandi abanyeshuri batiga.“ )
Akomeza agira ati” Kuva uyu mwaka watangira mu kwa cyenda, kugeza ubungubu, hari internet nyeya, nabwo ntago ari ahantu hose.”
Shema avuga ko kuba batagerwaho na internet ihagije bidindiza amasomo yabo
Ati” Hafi y’ibintu byose bikorerwa kuri murandasi, yaba amanota, yaba n’amasomo kuyaduha biba ari kuri WhatsApp n’ahandi. Iyo ubuze internet ntago wakora ubushakashatsi, kandi ubumenyi bwa Kaminuza ntago ari nka Secondary umwarimu aguha note ngo wandike, biba ari ngombwa ko umuntu yishakira amakuru akaba yajya kuri YouTube akiga, urumva biratubangamira cyane mu buryo bw’imyigire.”
Abanyeshuri biga muri Kaminuza y’u Rwanda ishami rya Huye bahurira ku kuba basaba ubuyobozi ko ibikorwaremezo bituma byagerwaho na internet byavugururwa, cyane ko ibikoresho bihari, kuko iyo uhageze urabibona, ariko mu by’ukuri bidakora.
