Kaminuza y’u Rwanda (UR) na Kaminuza yigisha ibyerekeye ubuzima (UGHE Butaro Campus), zaje muri Kaminuza nziza 10 zo munsi y’ubutayu bwa Sahara.
Ibi ni ibyavuye muri raporo ya 2024 ya Times Higher Education’. Iyi raporo yakusanyije amakuru yo muri Kaminuza 129 zo mu bihugu 22 biri munsi y’ubutayu bwa Sahara, bagendeye kuziza imbere mu guteza imbere ibihugu zikoreramo.
Iyi raporo ikorwa hagendewe ku nkingi 20 zikubiye muri eshanu, zirimo ibijyanye n’imari, uburyo zikorana n’abanyeshuri, gukorera mu mucyo, imiyoborere yazo n’uburyo zigira uruhare mu gukemura ibibazo byibasira umugabane wa Afurika.
Kuri uru rutonde UGHE ( The University of Global Health Equity ) yaje ku mwanya wa kane, aho ifite amanota menshi mu gukorana n’abanyeshuri bayo, mu gihe UR yaje ku mwanya wa gatandatu, ifite amanota menshi mu kuzamura ireme ry’uburezi ry’abanyeshuri bayigamo.
Kaminuza yaje ku mwanya wa mbere ni University of Johannesburg’ ifite amanota menshi mu bijyanye n’imari no gukorera mu mucyo, ikurikirwa na University of Pretoria, na University of Witwatersrand yaje ku mwanya wa gatatu, zose zo muri Afurika y’Epfo.
Ku mwanya wa kane hari UGHE yo mu Rwanda, ku mwanya wa gatanu hari University of Ghana, ku mwanya wa gatandatu hari UR, ku mwanya wa karindwi hari SIMAD University yo muri Somalia, ku mwanya wa munani hari Makerere University yo muri Uganda, ku mwanya wa cyenda hari Ashesi University yo muri Ghana, mu gihe ku mwanya wa 10 hari University of KwaZulu-Natal yo muri Afurika y’Epfo.
