Umujyi wa Kigali wateguje gahunda y’ihuriro ry’isangano ry’urubyiruko ryiswe ‘Kigali Youth Festival’, rigamije guhuriza hamwe urubyiruko ruri hagati y’imyaka 16-31, rutuye mu Mujyi wa Kigali, aho ruzaba rukora ibikorwa bitandukanye bigamije guteza imbere igihugu.
Iyi gahunda igiye kuba ku nshuro ya gatatu, aho biteganyijwe ko izatangira tariki ya 10 Mutarama 2025, muri Kigali Pele Stadium, guhera saa Munani z’amanywa, ikazakomereza indi minsi mu mirenge itandukanye igize Umujyi wa Kigali, kugeza tariki ya 31 Mutarama 2025.
Umuvugizi w’Umujyi wa Kigali, Emma Claudine, yabwiye Umunota ko ‘Kigali Youth Festival’ yateguwe hamijwe kurushaho gukundisha urubyiruko igihugu ndetse ukazaba ari n’umwanya mwiza warwo wo kwerekana ibyo rukora mu buzima bwa buri munsi.
Emma Claudine yavuze ko uyu mwaka urubyiruko ruzakora amarushanwa y’imbyino zaba iza gakondo n’izigezweho, imikino y’amaguru n’amaboko, ibitaramo ndetse n’imurikabikorwa ry’imishinga y’urubyiruko rizabera mu Imbuga City Walk.
Ati “Twagiye tugira amarushanwa mu mbyino twibanda kuri gakondo, ariko uyu mwaka twagarutse no ku mbyino za kizungu. Iyo dukoze imurikabikorwa haza ibikorwa bitandukanye ntabwo biba bimeze kimwe n’iby’umwaka ushize. N’ibitaramo dukora bigenda bihinduka, abahanzi twari kumwe umwaka ushize ntabwo ari bo bongera bakagaruka.”
Yakomeje avuga ko urubyiruko ruzitabira iri huriro ruzagira umwanya wo kuganirizwa na Minisiteri y’Ubumwe bw’Abanyarwanda n’Inshingano Mboneragihugu, MINUBUMWE, hagendewe ku byo rukwiriye kuba rwamenya bijyanye no gukunda igihugu.
Emma Claudine yakanguriye urubyiruko kuzitabira iri huriro kuko ari umwanya mwiza wo guhura rugasabana, rukungurana ibitekerezo ndetse rwibutswa inshingano rufite mu kubaka no gukunda igihugu.
Ati “Urubyiruko ruzahura n’abayobozi batandukanye bashobora kugira ibyo barwungura bijyanye n’umuco Nyarwanda, n’umuco wo gukunda igihugu, n’ibindi byose bijyanye no kwiyubaka no kugira uruhare mu kubaka igihugu.”
Kigali Youth Festival izasozwa tariki ya 31 Mutarama 2025, mu cyiswe ‘Uwa Gatanu w’Igitaramo gishyushye’, kizabera muri Kigali Pele’ Stadium, ahazaba hizihizwa Intwari z’u Rwanda.
