Kuri uyu wa 9 Ukuboza 2024, Urukiko rwo mu Bufaransa rwahamije umunya-Cameroun, Charles Onana ibyaha bigendanye no guhakana no gupfobya Jenoside yakorewe Abatutsi mu 1994, binyuze mu gitabo yasohoye kitwa ‘Rwanda, la vérité sur l’Opération Turquoise: Quand les archives parles”.
Ni urubanza rwatangiye tariki ya 7 Ukwakira 2024, aho Charles Onana ashinjwa gupfobya no kugoreka amateka ya Jenoside yakorewe Abatutsi, abinyujije mu gitabo yanditse kivuga ko Jenoside itigeze itegurwa. Ibi birego byatanzwe na CPCR, Survie na IBUKA France.
Uru rubanza kuva rutangira rwitabiriwe n’Abantu benshi barimo Abanyarwanda bari ku ruhande rw’abarega n’uregwa, n’abandi bakomoka mu bihugu nka Repubulika Iharanira Demokarasi ya Congo.
Mu kuburana kwa Onana yagaragaje ko atigeze ahakana Jenoside yakorewe Abatutsi mu 1994, ariko akagaragaza isano iri hagati y’aya mateka n’ihanurwa ry’Indege ya Habyarimana Juvenal, avuga ko RPF Inkotanyi yanze ko Jenoside ikorwa nk’uko u Bufaransa bwari bwarabiteguye.
Nyuma y’uko urukiko rwo mu Bufaransa ruhamije Charles Onana ibyaha yari akurikiranyweho, Minisitiri w’Ububanyi n’Amahanga n’Ubutwererane w’u Rwanda, Amb Nduhungirehe Olivier, yashimiye iki cyemezo.
Yifashishije urubuga rwa X, yanditse ubutumwa agira ati” Ni icyemezo cyiza nizera ko kizaca intege abahakana Jenoside barimo abanyamakuru, abanditsi n’abanyepolitiki bari mu Burayi no mu Karere kacu.”
Muri Mata 2024, ubushinjacyaha bw’u Bufaransa bwatangaje ko hari amadosiye agera muri 40 yabakekwaho ibyaha bifitanye isano na Jenoside yakorewe Abatutsi mu 1994, ndetse ko ruzagerageza kuyaburanisha yose.
