Perezida Kagame, uri mu Mujyi wa Algiers, yasuye Ishuri ry’Igihugu cya Algeria ryigisha ibijyanye n’Ubwenge Buhangano, ENSIA [National School of Artificial Intelligence], ndetse abonana n’abanyeshuri batanu b’Abanyarwanda baryigamo.
Umukuru w’Igihugu yageze muri Algeria mu ruzinduko rw’iminsi ibiri, ku wa Kabiri tariki ya 3 Kamena 2025, yakirwa na Perezida w’iki gihugu, Abdelmadjid Tebboune.
Mu bikorwa yagombaga gukora harimo no gusura Ishuri ry’Igihugu cya Algeria ryigisha ibijyanye n’Ubwenge Buhangano, AI, rya ENSIA [National School of Artificial Intelligence], ryigamo Abanyarwanda batanu.
Perezida Kagame ubwo yasuraga iri shuri yeretswe imikorere yaryo mu gutanga ubumenyi mu bijyanye n’ubushakashatsi no guhanga ibishya hifashishijwe AI [Artificial Intelligence], ndetse anabonana n’abo banyeshuri batanu b’Abanyarwanda.
Iri shuri ritanga amasomo y’Icyiciro cya Kabiri n’icya Gatatu cya Kaminuza muri Artificial Intelligence and Data Science, ndetse ku munsi wabanje ryari ryasuwe na Minisitiri w’Ikoranabuhanga na Inovasiyo, Paula Ingabire, asobanurirwa bumwe mu bushakashatsi bwakozwe n’iri shuri ndetse n’imishinga y’ikoranabuhanga rifite.
U Rwanda ni kimwe mu bihugu bya Afurika bimaze kwimakaza ikoreshwa ry’ikoranabuhanga ry’ubwenge buhangano mu bikorwa bitandukanye hagamijwe kuzamura imikorere, guhanga udushya no guteza imbere imibereho myiza y’abaturage.
Iri koranabuhanga ry’ubwenge buhangano rikoreshwa mu rwego rw’ubuzima, uburezi ndetse hari n’ibigo bitanga ubumenyi ku bijyanye n’ubwenge buhangano birimo Carnegie Mellon University Africa na Creativity Lab Rwanda itanga amahugurwa ku bana bato mu byerekeye AI.
Si aha gusa kuko iri koranabuhanga rikoreshwa no mu buhinzi, mu miyoborere, mu nzego za Leta ndetse no gucunga umutekano n’ahandi bituma u Rwanda ruza imbere mu bihugu bya Afurika byumvise neza politiki y’ikoreshwa ry’ubwenge buhangano ndetse ikarishyira mu bikorwa.
Leta y’u Rwanda yiyemeje gushora miliyoni $76.5 mu gihe cy’imyaka itanu kugira ngo ishyire mu bikorwa politiki yo kwihutisha iterambere ry’Igihugu hifashishijwe ubwenge buhangano (AI Policy) ndetse u Rwanda rugenda rwakira inkunga nka miliyoni 200$ zatanzwe na Banki y’Isi mu gukwirakwiza ikoranabuhanga mu Gihugu hose.
