Twagirayezu Didier wa Kayonza Cycling Club na Umutoni Sandrine wa Bugesera Cycling Team, begukanye Shampiyona y’Igihugu y’Amagare ikinwa n’abatarengeje imyaka 19.
Iyi shampiyona yabaye Ku Cyumweru tariki ya 29 Nzeri 2024, yateguwe ku nshuro ya kabiri n’Ishyirahamwe ry’Umukino w’Amagare mu Rwanda (FERWACY) yitabiriwe n’abana bari hagati y’imyaka 11 na 19, basanzwe bakina amarushanwa ya Youth Racing Cup, nyuma y’iya 2023 yabaye mu Kuboza muri Parking ya Kigali Pelé Stadium.
Twagirayezu Didier wa Kayonza Cycling Club yabaye uwa mbere mu bahungu batarengeje imyaka 19 nyuma yo kuzenguruka inshuro 22 intera ya kilometero 1,3 akoresheje iminota 41, amasegonda 17 n’ibice bine.
Mu bakobwa, hatsinze Umutoni Sandrine wa Bugesera Cycling Team wakoresheje iminota 41 n’amasegonda 18 nyuma yo kuzenguruka inshuro 19. Abana 115 ni bo bitabiriye iyi Shampiyona y’Igihugu y’Amagare mu byiciro bitanu byakinwe.
Amanota abatsinze babonye azateranywa ku ya Youth Racing Cup bakina buri kwezi. Isiganwa ritaha rizabera kuri Field of Dreams mu Bugesera ku wa 13 Ukwakira 2024.
