Ubushinjacyaha Bukuru bwaregeye Urukiko rw’Ibanze rwa Kicukiro dosiye ya Ingabire Victoire Umuhoza kugira ngo aburanishwe ku ifungwa ry’agateganyo.
Ubushinjacyaha Bukuru bwatangaje ko bwashyikirije Urukiko dosiye ya Ingabire ku wa 30 Kamena 2025, nyuma y’iperereza ryakozwe n’Urwego rw’Igihugu rw’Ubugenzacyaha (RIB), rwashyikirijwe ubushinjacyaha ku wa 24 Kamena 2025.
Ingabire Victoire yatawe muri yombi ku wa 19 Kamena 2025, akurikiranyweho ibyaha birimo guhungabanya umudendezo w’Igihugu.
Ingabire Victoire washinze ishyaka DALFA-Umurinzi akurikiranyweho kuba mu mugambi w’abantu icyenda barimo umunyamakuru Nsengimana Theoneste, ufitanye isano no guhirika ubutegetsi bw’igihugu.
Mu rubanza rwa mbere rwabaye ku wa 19 Kamena 2025, Ingabire yahakanye ibyaha ashinjwa, birimo kuba yaragize uruhare muri uyu mugambi wa Sylvain Nsabimana, ushinjwa kuba yarashishikarizaga abandi kwifatanya nawe muri icyo gikorwa.
Ubushinjacyaha buvuga ko uwitwa Nsabimana Sibomana ari mu bayoboraga gahunda y’amahugurwa, yari agamije kwigisha uburyo bwo guhirika ubutegetsi hifashishijwe uburyo butari ubw’intambara.
Ayo mahugurwa ngo yabaga yitiriwe kuba amahugurwa y’icyongereza, ariko intego nyayo ikaba iyindi.
Ingabire Victoire, yari yararekuwe muri Nzeri 2018 nyuma yo guhabwa imbabazi na Perezida wa Repubulika Paul Kagame, aho yari amaze imyaka igera kuri 8 muri gereza ku byaha byo gushoza imvururu, gushinga umutwe w’inyeshyamba, no gupfobya Jenoside yakorewe Abatutsi mu 1994.
