Mu Kigo cy’Ubutore cya Nkumba, giherereye mu Karere ka Burera, hatangijwe ku mugaragaro icyiciro cya 15 cy’Itorero Indangamirwa. Iri torero rizamara iminsi 45, rikaba rigamije gutoza urubyiruko indangagaciro z’umuco Nyarwanda, urukundo rw’igihugu, ubwitange n’ubunyangamugayo.
Itorero Indangamirwa ritegurwa na Minisiteri y’Ubumwe bw’Abanyarwanda n’Inshingano Mboneragihugu (MINUBUMWE). Rihuriza hamwe urubyiruko ruba mu Rwanda no mu mahanga kugira ngo bahabwe inyigisho z’ubutore, amateka y’u Rwanda, icyerekezo cy’igihugu n’inshingano bafite mu kurinda ibyagezweho no kubaka u Rwanda ruzira amacakubiri.
Mu gutangiza ku mugaragaro icyiciro cya 15 cy’iri torero, Minisitiri w’Ubumwe bw’Abanyarwanda n’Inshingano Mboneragihugu, Dr Bizimana Jean Damascène, yasabye urubyiruko kurangwa n’indangagaciro z’ubutore no kuzirikana amahoro Igihugu gifite ubu.
Yabibukije ko ari bo maboko azubaka u Rwanda rw’ejo, bityo bakwiye kurangwa n’intego, ubunyangamugayo no kuba icyitegererezo mu muryango nyarwanda.
Abitabiriye iri torero bazahabwa amasomo y’indangagaciro na kirazira z’umuco nyarwanda, ndetse banungurane ibitekerezo ku ruhare rwabo mu iterambere ry’igihugu. Hazatangwa kandi inyigisho ku mateka y’u Rwanda, aho igihugu kigeze n’uruhare rwabo mu kukirinda no kukiteza imbere.
Iri torero rifatwa nk’urubuga rwo kwimakaza ubumwe n’ubutore mu rubyiruko, rukazaba urufunguzo mu gutegura abayobozi beza b’ejo hazaza. Ni gahunda y’igihugu yashyizweho hagamijwe kubaka umusingi ukomeye w’ubumwe n’iterambere rirambye binyuze mu rubyiruko.
