Abanyeshuri bagera ku 255,498 barimo abarenga 700 bafite ubumuga batangiye gukora ibizamini bya Leta bisoza icyiciro rusange (O’Level) n’icyiciro cya kabiri cy’amashuri yisumbuye (A’Level).
Ibizamini bya Leta by’umwaka wa 2024/2025 byatangiye kuri uyu wa gatatu, tariki ya 9 Nyakanga 2025.
Nk’uko bitangazwa Kigo cy’Igihugu gishinzwe Ibizamini n’Ubugenzuzi bw’Amashuri (NESA), muri aba banyeshuri bari gukora ibizamini harimo 149,134 barangije icyiciro rusange na 106,364 barangije icyiciro cya kabiri cy’amashuri yisumbuye. Abandi 5,283 ni abanyeshuri bigenga bari gukora ibizamini ku giti cyabo.
Ibizamini birimo gukorerwa mu bigo by’amashuri 1,595 hirya no hino mu gihugu. Ugereranyije n’umwaka ushize w’amashuri wa 2023/2024, umubare w’abanyeshuri biyongereyeho 19,926, kuko icyo gihe bari 235,572.
Mu banyeshuri bose bari gukora ibizamini, harimo 782 bafite ubumuga, barimo 459 bo mu cyiciro rusange na 323 bo mu cyiciro cya kabiri. Minisiteri y’Uburezi yatangaje ko aba banyeshuri bazahabwa ubufasha bwihariye kugira ngo babashe gukora ibizamini mu buryo buboroheye.
Ubu bufasha burimo impapuro zanditse mu nyuguti za ‘braille’ ku bafite ubumuga bwo kutabona, impapuro zanditswe mu nyuguti nini ku bafite ibibazo by’amaso, ikoreshwa ry’ibikoresho byihariye ku bafite ubumuga bw’ingingo, ndetse n’abanditsi (scribes) bafasha abakandida batabasha kwiyandikira. Aba banyeshuri banahabwa igihe cy’inyongera mu gukora ibizamini.
Muri aba banyeshuri harimo n’abagera kuri 14 bo mu Igororero ry’Abana rya Nyagatare nabo bahawe amahirwe yo gukora ibizamini bya Leta, barimo umukobwa umwe n’abahungu 13.
