Guverinoma y’u Rwanda ku bufatanye n’Ubwami bwa Jordanie yatanze inkunga y’ubutabazi igamije gufasha abaturage bo mu Gace ka Gaza muri Palestine bahanganye n’ingaruka zikomeye z’intambara.
Iyo nkunga irimo ibiribwa n’ibikoresho by’ubuvuzi birengeje toni 40, yagejejwe i Ammani, Umurwa Mukuru wa Jordanie, aho yakiriwe n’Umuryango w’Abagiraneza wa Jordan Hashemite Charity Organization, akaba ari nawo uzayigeza ku baturage ba Gaza.
Mu itangazo ryasohowe n’inzego zombi, u Rwanda na Jordanie byagaragaje ko iki gikorwa ari ikimenyetso cy’ubufatanye n’ubwitange bigamije kurengera ubuzima bwa muntu no gutabara abibasiwe n’ingaruka z’intambara.
Iyi gahunda imaze amezi ane, aho hamaze gutangwa imfashanyo zitandukanye zirimo ibiribwa, imiti, n’ibikoresho by’isuku, byose bigamije kugoboka abaturage ba Gaza babayeho mu buzima bukomeye kubera intambara n’ibura ry’ibikoresho by’ibanze.
U Rwanda rwaherukaga gutanga inkunga nk’iyi ku bari mu kaga muri Gaza mu kwezi kwa Gicurasi 2025.
Guverinoma y’u Rwanda yatangaje ko izakomeza gutanga umusanzu wayo mu bikorwa by’ubutabazi, binyuze mu bufatanye mpuzamahanga, ishyira imbere indangagaciro zo kurengera ubuzima no guteza imbere imibereho myiza y’abari mu kaga.
