Ikigo cy’Igihugu cy’Ibarurishamibare (NISR) cyatangaje ko ibiciro byo ku masoko mu Rwanda byazamutseho 7% muri Kamena 2025, ugereranyije na Kamena 2024. Iri zamuka ryatewe ahanini n’iry’ibiciro by’ibiribwa n’ibinyobwa bidasembuye.
Imibare yashyizwe ahagaragara na NISR kuri uyu wa Gatatu, tariki ya 10 Nyakanga 2025, igaragaza ko izamuka ry’ibiciro muri Kamena 2025 ryiyongereye ugereranyije n’iryo muri Gicurasi 2025, aho ryari kuri 6.9%.
Ibyiciro byagize uruhare runini mu izamuka ry’ibiciro harimo ibiribwa n’ibinyobwa bidasembuye byazamutseho 8.7% ugereranyije na Kamena 2024, nubwo byagabanutseho 1.5% ugereranyije na Gicurasi 2025.
Ibiciro by’ibiribwa n’icumbi (Restaurants and Hotels) byazamutseho 17.8% ugereranyije na Kamena 2024, ibiciro by’ubwikorezi (Transport) byazamutse 4.4%, ibiciro by’inzu, amazi, amashanyarazi, gazi n’ibindi bicanwa bizamukaho 3.6%.
Mu bindi byiciro, ibicuruzwa by’imbere mu gihugu byazamutseho 6.7%, ibiciro by’ibitumizwa mu mahanga bizamukaho 8%, ibiciro by’ibicuruzwa bishya bizamukaho 10.2%, ibiciro by’ingufu bizamukaho 1.2%, ibiciro by’ibintu bitarimo ibiribwa n’ibikomoka ku ngufu bizamukaho 6,6%.
NISR ivuga ko muri rusange, ugereranyije Kamena 2025 na Gicurasi 2025, ibiciro byagabanutseho 0.2%, ahanini bitewe n’igabanuka ry’ibiciro by’ibiribwa n’ibinyobwa bidasembuye.
