Amavubi y’abatarengeje imyaka 20 yerekeje muri Tanzania aho yitabiriye amarushanwa ya ‘CECAFA U20’, aho bazahitamo amakipe abiri azahagararira Akarere mu Gikombe cya Afurika mu batarengeje imyaka 20.
Mu rukerera rwo kuri uyu wa Gatanu, tariki ya 4 Ukwakira 2024, ni bwo aba basore bahagurutse i Kigali berekeza i Dar es Salaam, hari nyuma y’amasaha make umutoza w’Amavubi U20, Eric Nshimiyimana, atangaje urutonde rw’abakinnyi 19 azifashisha muri iyi mikino.
U Rwanda ruzatangira rukina na Sudani tariki ya 8 Ukwakira, rukurikizeho Kenya tariki ya 10 Ukwakira mbere yo guhura na Tanzania tariki 13 Ukwakira, rukazasoreza kuri Djibouti tariki 15 Ukwakira 2024.
Iyi mikino izabera ku bibuga bitatu birimo Azam Complex, KMC Stadium na Major General Isamuhyo Stadium zihereye mu mujyi wa Dar es Salaam muri Tanzania.
