Guverinoma y’u Rwanda, iya Repubulika Iharanira Demokarasi ya Congo (RDC) ndetse n’Ishami ry’Umuryango w’Abibumbye ryita ku mpunzi (UNHCR) bahuriye mu nama igamije kwemeza gahunda yo gufasha impunzi z’Abanye-Congo ziri mu Rwanda n’iz’Abanyarwanda ziri muri Congo gutaha ku bushake.
Iyi nama yabaye kuri uyu wa kane, tariki ya 24 Nyakanga 2025, yabereye i Addis Ababa muri Ethiopia, yitabiriwe n’intumwa za guverinoma zombi hamwe n’abahagarariye UNHCR. U Rwanda rwari ruhagarariwe na Ambasaderi Charles Karamba.
Ni itangazo ryashyizweho umukono hagendeye ku masezerano y’impande eshatu (Tripartite Agreements) arebana n’itahuka ku bushake ry’impunzi z’ibihugu byombi, yasinywe ku wa 17 Gashyantare 2010, n’amahame akubiye mu masezerano mpuzamahanga yo mu 1951 agena uburenganzira bw’impunzi, yongeye kuvugururwa mu 1967, n’amasezerano y’Umuryango w’Ubumwe bw’Afurika (OUA) yo mu 1969 yerekeye ibibazo byihariye by’impunzi muri Afurika.
Mu byemeranyijwe n’impande zahuriye muri iyi nama, harimo no gufasha gutaha impunzi z’Abanyarwanda 600 ziri mu Mujyi wa Goma, bizakorwa ku bufatanye n’ubuyobozi bwa RDC na UNHCR.
Harimo kandi gutegura uburyo bwo gusubiza abazaba batashye mu buzima busanzwe, harimo gukusanya imyirondoro, kubaha ubwenegihugu, kubashakira inzu zo kubamo, uburezi, ubuvuzi, ibyangombwa birimo indangamuntu n’ibindi.
Hemejwe kandi ko hagomba kunozwa uburyo bwo gusangira amakuru no guhuza ibikorwa hagati y’impande zombi, bemeza ko hazakomeza gukorwa inama zizajya zihuza impuguke z’impande zose mu gukomeza gushyira mu bikorwa iyi gahunda. Izi nama zizajya zikorwa imbonankubone cyangwa hifashishijwe ikoranabuhanga.
Ibyemeranyijwe muri iyi nama birashingira ku masezerano y’amahoro aherutse gushyirwaho umukono hagati ya RDC n’u Rwanda, i Washington, ku wa 27 Kamena 2025, ndetse n’amahame y’ibigize amasezerano y’amahoro yasinywe hagati ya RDC na AFC/M23, i Doha, ku wa 19 Nyakanga 2025.
Abitabiriye inama bashimiye Leta ya Ethiopia, yakiriye iyi nama ndetse banashimira uruhare rwa UNHCR n’Umuryango wa Afurika Yunze Ubumwe mu guteza imbere amahoro n’umutekano mu Karere.
