Minisitiri w’Ububanyi n’Amahanga n’Ubutwererane w’u Rwanda, Amb. Olivier Nduhungirehe, yasuye inzu ndangamurage ya Liberiya iri mu murwa mukuru wa Minova, anaganira n’urubyiruko rwo muri iki gihugu rwize mu Rwanda.
Minisitiri Amb.Nduhungirehe ari mu ruzinduko rw’akazi rw’iminsi ibiri muri Liberia, guhera ku gatatu, tariki ya tariki ya 10 Nzeri 2025.
Mu rwego rwo gusobanukirwa amateka n’umuco wa Liberiya, Minisitiri Amb. Nduhungirehe yasuye inzu ndangamurage ya Liberiya iri i Monrovia, asobanurirwa byinshi ku mateka yaranze iki gihugu, ndetse n’umuco uranga abaturage bacyo.
Minisitiri yanahuye na bamwe mu rubyiruko rwa Liberiya rwize mu Rwanda, abaha umwanya wo gusangiza ubunararibonye bwabo, anabifuriza ishya n’ihirwe mu rugendo rwo kugera ku nzozi zabo, abizeza ko ubumenyi bakuye mu Rwanda buzabagirira akamaro mu hazaza habo.
Muri uru ruzinduko, Minisitiri Amb. Nduhungirehe yahuye n’Umuyobozi wa Monrovia, John-Charuk Sifa, baganira ku buryo bwo gushimangira ubufatanye hagati y’Umujyi wa Kigali n’uwa Monrovia, hagamijwe guteza imbere imikoranire izamura imibereho myiza y’abatuye imijyi yombi.
Yanagiriye ibiganiro na Abraham Darius Dillon, Perezida wa Komisiyo y’Ububanyi n’Amahanga ya Sena ya Liberiya. Abayobozi bombi baganiriye ku buryo bwo gushimangira umubano hagati y’ibihugu byombi binyuze mu Nteko zishinga amategeko.
Muri uru ruzinduko kandi, Minisitiri Amb.Nduhungirehe yahuye na Minisitiri w’Ububanyi n’Amahanga wa Liberiya, Sara Beysolow Nyanti, hasinyiwe amasezerano yo gushyiraho Komisiyo ihoraho y’ubufatanye hagati y’ibihugu byombi, ndetse n’amasezerano yo gukuraho Viza abaturage b’u Rwanda na Liberiya.
U Rwanda na Liberiya bikomeje gushimangira ubufatanye mu nzego zitandukanye zirimo ububanyi n’amahanga, uburezi, umuco, iterambere ry’imijyi ndetse n’ubukungu. Uyu mubano wubakiye ku ntego yo koroshya urujya n’uruza rw’abaturage, kunoza imikoranire no guteza imbere iterambere rirambye ku mpande zombi.
Uretse ibi kandi u Rwanda na Liberia ni ibihugu bijya guhuza amateka kuko Liberia yazahajwe n’intambara mu myaka ya 1990 ikangiza byinshi mu gihe u Rwanda rwashegeshwe na Jenoside yakorewe Abatutsi yahitanye abasaga miliyoni.
