Abasifuzi b’umukino wa Volleyball mu Rwanda, basoje umwiherero w’iminsi ibiri ugamije kongera kwihugura no gutegura umwaka utaha w’imikino wa 2024-2025.
Aya mahugurwa yasojwe kuri iki cyumweru tariki ya 13 Ukwakira 2024, yari yitabiriwe n’abasifuzi mpuzamahanga babiri basanzwe basifura Volleyball yo mu nzu (Indoor Volleyball) ndetse n’umusifuzi mpuzamahanga wa Beach Volleyball, abasifuzi ku rwego rw’Igihugu, abo ku rwego rw’Intara ndetse n’abatangizi, bose hamwe bakaba bari 80.
Umuyobozi w’abasifuzi mu Rwanda, Ndayisaba Alphonse, avuga ko intego y’aya mahugurwa akenshi ari ukongera gukarishya ubumenyi kuri uyu mukino haba mu kibuga ndetse n’amategeko.
Ati” Ni amahugurwa agamije kongera gukarishya ubumenyi bw’abasifuzi no gukora isuzumabumenyi ku mategeko agenga umukino wa Volleyball na Beach Volleyball no kurebera hamwe uko umwaka w’imikino ushize wagenze no gutegura neza umwaka w’imikino wa 2024-2025.”
Aya mahugurwa ngarukamwaka akorwa mbere gato y’uko umwaka w’imikino muri Shampiyona ya Volleyball utangira, hareberwa hamwe uko umwaka ushize wagenze no kwihugura ku mategeko bategura Shampiyona ikurikiyeho.
