Anita Pendo, Sandrine Isheja na Kalimpinya Queen ni bamwe mu bagore bazitabira isiganwa ry’imodoka rizwi nka Rwanda Mountain Gorilla, muri uyu mwaka wa 2024.
Iri rushanwa ryitezwemo imodoka 28 rizatangira tariki ya 18-20 Ukwakira, ndetse imyiteguro ikaba irimbanyije mu bazagaragara muri iri siganwa, dore ko iminsi isigaye ibarirwa ku ntoki.
Sandrine Isheja azafatanya na Davite Giancarlo, bazasiganwa bifashishije imodoka iri mu bwoko bwa Mitsubishi Lancer Evo X iri ku rwego rwo guhatana muri shampiyona ya Afurika.
Anita Pendo azafatanya na Adolphe Nshimiyimana bo bazasiganwa bifashishije imodoka yo mu bwoko bwa Subaru Impreza, ari nayo Kalimpinya uzaba afatanyije na Olivier Ngabo bazaba bafite.
Uretse Anita Pendo, Sandrine Isheja na Kalimpinya Queen uyu mukino wamaze no kwinjiramo undi mugore witwa Djamila Niwemugore uzaba akinana na Bryan Murengezi.
