Kaminuza Nkuru y’u Rwanda, na Sookmyung Women’s University yo muri Koreya y’Epfo, bagiranye ibiganiro bigamije guteza imbere ubufatanye mu bushakashatsi n’uburezi.
Umuyobozi Mukuru w’agateganyo wa Kaminuza y’u Rwanda, Prof. Didas Kayihura Muganga, yakiriye Moon Si yeun uyobora Sookmyung Women’s University yo muri Koreya y’Epfo, mu biganiro bigamije gukomeza gushimangira ubufatanye mu nzego zitandukanye z’uburezi.
Ibi biganiro byabaye intangiriro ry’ubufatanye bwagutse mu bushakashatsi no mu iterambere, mu guharanira ireme ry’uburezi, no mu guteza imbere umuco hagati y’ibihugu byombi.
Kaminuza zombi zisangiye icyerekezo cyo guteza imbere abanyeshuri, gukomeza guhanga udushya no gusangira ubumenyi n’ubunararibonye.
U Rwanda na Koreya y’Epfo bimaze igihe bifatanya mu burezi hagamijwe guteza imbere ubumenyi, ubushakashatsi n’ikoranabuhanga.
Koreya y’Epfo ibinyujije muri KOICA yagiye itanga amahugurwa ku Banyarwanda mu byerekeye n’ikoranabuhanga, gucunga imishinga, no guteza imbere uburezi bushingiye ku ikoranabuhanga.
Abanyeshuri b’Abanyarwanda bagiye bahabwa amahirwe yo kwiga muri Korea y’Epfo ku rwego rwa Master’s na PhD.
