Ababiligi Axel Baumans na Pierre de Froidmont bongeye kwegukana agace ka kabiri k’umukino w’isiganwa ry’amagare yo mu misozi ‘Rwanda Epic 2024’.
Ku wa kabiri tariki ya 22 Ukwakira 2024, hakinwe agace ka kabiri ka ‘Rwanda Epic 2024’, aho abakinnyi bahagurukiye kwa Nyirangarama basoreza mu Kigo cy’Iterambere ry’Umukino w’Amagare muri Afurika (Africa Rising Cycling Center- ARCC) i Musanze.
Kuri uyu munsi wa kabiri wari ugizwe n’intera y’ibilometero 95.5, Ababiligi Axel Baumans na Pierre de Froidmont bongeye kwanikira abandi nk’uko babikoze ku wa mbere, begukana agace ka kabiri katereraga ku musozi wa Kabuye ufite ubutumburuke bwa metero 2551 bakoresheje amasaha ane n’iminota 34.
Abadage Daniel Gathof na Peter Schermann baje ku mwanya wa kabiri basizwe iminota icyenda, naho Abanyarwanda Munyaneza Didier na Banzi Bukhari baba aba gatatu basizwe iminota 16.
Mu cyiciro cy’abagore bakina bafatanyije, agace ka kabiri kegukanywe n’Umunyarwandakazi Ntakirutimana Marthe wari kumwe n’Umubiligikazi Siska Marrécau bakoresheje amasaha atandatu, iminota 30 n’amasegonda ane.
Mu ikipe ivanze, agace kegukanywe n’Abanya-Espagne Oscar Pujol na Mude Rodriguez bakoresheje amasaha atanu, iminota 54 n’amasegonda 19, bakurikirwa n’abanyarwanda Nirere Xaverine ukinana na Muhoza Eric bakoresheje amasaha atandatu, iminota 18 n’amasegonda 22.
Mu cyiciro cy’abakina ku giti cyabo, Umudage Hannes Ebersbächer niwe witwaye neza akoresheje amasaha atanu, iminota 53 n’amasegonda 28, akurikirwa n’Umunyarwanda Irimaso Jean Félix wakoresheje amasahata atanu, iminota 58 n’amasegonda 48.
