U Rwanda rwitabiriye imurikagurishwa rikomeye ry’Ubukerarugendo riri kubera i Sydney muri Australia, rizwi nka ‘Luxperience 2025’.
Iri murikagurishwa ryatangiye ku wa kabiri, tariki ya 7 Ukwakira 2025, rikaba imwe mu yihariye mu rwego rw’ingendo, ibizwi nka ‘Luxury travel’.
Rihuza ibigo bikora ubukerarugendo byo mu Karere ka Australia n’inyanja ya Pasifika, rikaba rigamije gufasha abashoramari, abakora ibijyanye n’ingendo za ba mukerarugendo n’abatanga serivisi z’ubukerarugendo guhura no gusangira amahirwe ari muri uru rwego.
Muri iri murikagurisha u Rwanda ruhagarariwe n’Ikigo cy’Igihugu Gishinzwe Iterambere (RDB), ku bufatanye n’Ambasade y’u Rwanda muri Singapore, hamwe n’abahagarariye amasosiyete y’Abanyarwanda bakora mu bukerarugendo n’ingendo mpuzamahanga.
Ibi bigo byo mu Rwanda byitabiriye iri murikagurisha mpuzamahanga hagamijwe kurushaho kumenyekanisha u Rwanda ku ruhando mpuzamahanga nk’ahantu hamaze gutera imbere ndetse hasurwa na ba mukerarugendo benshi.
U Rwanda ruri kumurika ibyiza nyaburanga biri mu gihugu nka pariki zibitse amateka y’urusobe rw’ibinyabuzima, ibikorwaremezo birimo amacumbi n’amahoteli ndetse n’ubukerarugendo bushingiye ku muco w’Abanyarwanda.
Kwitabira iri murikagurisha bigaragaza ubushake bw’u Rwanda mu gukomeza gufungurira amarembo u Rwanda ku isoko mpuzamahanga, by’umwihariko mu rwego rw’ubukerarugendo nk’imwe mu nkingi zikomeye z’iterambere ry’u Rwanda.
