Minisitiri w’Intebe wungirije wa Lesotho, Madamu Nthomeng Majara uri mu ruzinduko rwa kazi rw’iminsi itandatu mu Rwanda, yasuye akarere ka Bugesera aho yigiye uburyo inzego z’ibanze zikorana n’abafatanyabikorwa mu kuzamura imibehereho myiza y’abaturage.
Iki gikorwa cyabaye ku wa Kane tariki ya 24 Ukwakira 2024, Minisitiri Majara ari kumwe n’itsinda ry’abayobozi mu nzego zibanze basuye umufatanyabikorwa w’Akarere ‘Gasore Serge Foundation’, berekwa ibikorwa bihakorerwa birimo ikibuga cy’amagare, amashuri yigisha abiganjemo abatishoboye ndetse n’aho ikipe y’amagare y’abakobwa ya Bugesera ikorera imyitozo.
Ubuyobozi bw’iki kigo bwasobanuye ko hatangirwa inyigisho zitandukanye zirimo izihabwa abakobwa batewe inda bakiri bato, izigisha kuzamura impano, ndetse s’ibi gusa kuko bafasha abahiga kwidagadura no kugarura icyizere cy’ejo hazaza.
Minisitiri Majara yashimye uburyo u Rwanda rumaze gutera imbere mu guhuriza hamwe inzego z’ibanze n’abafatanyabikorwa mu gukora ibikorwa bizamura imibereho myiza y’abaturage.
Ati” Nishimiye kubona uburyo inzego z’ibanze zifatanya n’abafatanyabikorwa batandukanye mu rwego rwo gushaka ibisubizo by’ibibazo bikibangamiye imibereho myiza y’abaturage, ni intambwe nziza yo kwigira ku miyoborere myiza y’igihugu cy’u Rwanda.”
Umuyobozi w’Akarere ka Bugesera, Mutabazi Richard yagaragarije iri tsinda uruhare rw’abafatanyabikorwa mu bikorwa biteza imbere abaturage, binyuze mu nkingi y’ubukungu, imibereho myiza, imiyoborere myiza n’ubutabera.
