Abapolisi bato bagera 2,256 bagize ikiciro cya 20, basoje amahugurwa bari bamazemo amezi icyenda mu Kigo cy’Amahugurwa cya Polisi y’u Rwanda giherereye i Gishari mu Karere ka Rwamagana.
Uyu muhango wabaye kuri uyu wa gatanu tariki ya 25 Ukwakira 2025, witabiriwe na Minisitiri w’umutekano w’imbere mu gihugu Vincent Biruta.
Uyu muhango wabimburiwe n’imyiyerekano ku mikino njyarugamba, akarasisi n’ibindi bigishijwe birimo kurasa, uburyo bwo guhosha urugamba, gutabara abantu bashimuswe n’ibyihebe n’ibindi.
Umuyobozi w’Ishuri rya Polisi rya Gishari, CP Robert Niyonshuti yagaragaje ko abasoje amahugurwa ari 2135, mu gihe 26 bahagaze kubera impamvu zitandukanye, aba bapolisi bakaba bazoherezwa mu bice bitandukanye harimo abazajya muri Polisi y’Igihugu, abazajya mu Rwego rw’Igihugu rushinzwe iperereza n’abazajya mu Rwego rushinzwe igorora.
Minisitiri w’Umutekano w’Imbere mu gihugu, Vincent Biruta, yavuze ko u Rwanda rwashyize imbere umutekano, ndetse ko abanyarwanda muri rusanjye bishimira akazi keza abapolisi bakora bituma u Rwanda rutera imbere buri mwaka.
Minisitiri Biruta yaboneyeho gushimira ababyeyi bemeye gutanga abana babo ngo bajye muri Polisi y’Igihugu, abizeza ko basanze bakuru babo ndetse inyigisho baba bahawe nibazubahiriza bizabafasha gutanga umusanzu ukomeye ku gihugu.
Ati “Muzarangwe n’ikinyabupfura, gukora kinyamwuga, gukorana umurava, kwanga umugayo no guharanira ishema ry’u Rwanda n’Abanyarwanda aho muzaba muri hose.”
