U Rwanda na Somalia byasinyanye amasezerano y’ubutwererane rusange ndetse byemeranya ishyirwaho rya komisiyo ihuriweho ishinzwe gukurikirana ishyirwa mu bikorwa ryayo, no gushaka izindi nzego ibihugu byombi byakoranamo.
Ni amasezerano yashyiriweho umukono i Kigali, kuri uyu wa Mbere, tariki ya 27 Ukwakira 2025.
Yasinywe na Minisitiri w’Ububanyi n’Amahanga w’u Rwanda, Amb. Olivier Nduhungirehe, na mugenzi we wa Somalia, Abdisalam Abdi Ali, uri mu Rwanda mu ruzinduko rw’akazi rw’iminsi ibiri.
Aba bayobozi bombi baganiriye ku mubano w’ibihugu byombi, bashimangira ko ubufatanye busanzwe hagati yabyo bwagize ingaruka nziza haba mu bya politiki, guteza imbere ishoramari n’ubufatanye mu nzego z’umutekano.
Banasinye amasezerano rusange y’ubufatanye, kandi bemeranya ko ishyirwa mu bikorwa ryayo rigomba kwihutishwa binyuze muri Komisiyo Ihuriweho (Joint Permanent Commission JPC).
Iyi komisiyo izakurikirana ishyirwa mu bikorwa ry’aya masezerano ndetse ninashake izindi inzego ibihugu byombi byakoranamo, zirimo ubutabera, uburezi, ubuhinzi, ikoranabuhanga n’ubufatanye mu by’amategeko mpuzamahanga.
Aba ba Minisitiri banaganiriye ku biganiro by’amahoro biri kubera i Doha no Washington, byibanda ku mutekano muke uri mu Burasirazuba bwa Repubulika Iharanira Demokarasi ya Congo (RDC).
U Rwanda rwashimye kandi uruhare rwa Somaliya muri Loni (UN Security Council) mu guhagararira inyungu z’Umugabane wa Afurika, binyuze mu ruhare rwayo rukomeje muri A3+ Group.
Impande zombi zemeranyije gukomeza gukorana no guhuza imbaraga hagamijwe guteza imbere inyungu basangiye no kugera ku ntego zungukira impande zombi.
