Abakunzi b’ikipe y’Igihugu y’Amavubi, baguriye abafana 10,000 amatike y’ 1000, kugirango baze kuryoherwa n’umukino wo kwishyura uri buhuze Amavubi n’ikipe ya Djibouti, bashaka itike ya Shampiyona Nyafurika ihuza abakinnyi bakina imbere mu bihugu byabo (CHAN 2024).
Ni itangazo ryanyujijwe ku rubuga rwa X rw’Ishyirahamwe ry’umupira w’amaguru FERWAFA, kuri uyu wa Kane, tariki ya 31 Ukwakira 2024.
FERWAFA yavuze ko abifuza aya matike bari bwinjire kugera saa kenda z’amanywa, banyuze ku muryango wegeranye na BK Arena ndetse n’uwahagana kuri Zigama CSS.
Ahandi uko ibiciro bihagaze muri VIP ni 10,000 Frw, VVIP ni 30000Frw mu gihe Executive Suite ari ibihumbi 50000 naho muri Sky Box ni miliyoni y’amafaranga y’u Rwanda.
Kuri uyu wa kane, saa 18h00, Amavubi ari bwakire ikipe ya Djibouti mu mukino wo kwishyura w’ijonjora ry’ibanze ryo gushaka itike ya CHAN 2024, nyuma y’uko atsinzwe igitego 1-0 mu mukino wa mbere wabaye ku Cyumweru, nabwo muri Stade Amahoro.
