Minisitiri w’Urubyiruko na Siporo w’Igihugu cya Madagascar, Abdulah Marson Moustapha, wagiriye uruzinduko mu Rwanda yarushimiye byinshi rwagezeho birimo ibikorwaremezo nka Stade Amahoro na BK Arena.
Ku wa Kane, tariki ya 7 Ugushyingo 2024, Minisitiri Abdulah Marson Moustapha ari kumwe na Minisitiri wa Siporo w’u Rwanda, Nyirishema Richard, basuye BK Arena na Stade Amahoro.
Minisitiri Abdulah yavuze ko yigiye byinshi kuri ibi bikorwaremezo by’u Rwanda, anashimangira ko bafite byinshi byo kwigira ku Banyarwanda, cyane ko ibihugu byombi bisanzwe bifitanye umubano mwiza.
Ati “Ni ibyishimo byinshi kuba nakiriwe na mugenzi wanjye, Minisitiri wa Siporo w’u Rwanda. Dushobora gukorera hamwe nk’ibihugu by’ibivandimwe. Nshimiye cyane Minisitiri wa Siporo ku kunyakira mu biro bye.”
Yakomeje ashimira Minisitiri Nyirishema wamutembereje amwereka ibikorwaremezo bijyanye na Siporo, biri ku rwego mpuzamahanga, u Rwanda rumaze kugeraho.
Minisitiri Abdulah yavuze ko ibi bikorwaremezo bizamura iterambere ry’Ubukungu bw’u Rwanda, ndetse ko bikwiye kubungabungwa neza kugira ngo bitangirika.
Yashimye cyane Stade Amahoro na BK Arena, avuga ko bizafasha byinshi mu iterambere ry’imikino mu Rwanda ndetse no muri Afurika.
Mu gusoza, Minisitiri Abdulah yagaragaje ko igihugu cya Madagascar na cyo kiri gukora cyane mu kubaka ibikorwaremezo by’imikino birimo ARENA ifite umubare munini w’abo ishobora kwakira, ndetse na Stade ifite imyanya ibihumbi 50, ikaba iri mu nzira zo gukorerwa ibikenewe kugira ngo igeze ku rwego mpuzamahanga rwa FIFA na CAF.
Minisitiri Nyirishema Richard nawe yashimiye mugenzi we wa Madagascar kuba yaje gusura ibikorwa by’imikino by’u Rwanda.
Yavuze ko hashobora kubaho ubufatanye bw’imikoranire hagati ya Minisiteri y’Urubyiruko na Siporo y’u Rwanda n’iya Madagascar, hagamijwe guteza imbere Siporo mu bihugu byombi.
Uretse gusura Stade Amahoro na BK Arena, Minisitiri Abdulah Marson Moustapha yagiranye inama n’abayobozi ba gahunda ya “YouthConnekt,” ihuza urubyiruko rwo hirya no hino muri Afurika kugirango bamenye gahunda zihari n’uruhare rwabo mw’iterambere ry’umugabane.
