Ingabo z’u Rwanda ziri mu butumwa bwo kugarura amahoro muri Repubulika ya Centrafrique (MINUSCA) zakoze ibikorwa by’ubukangurambaga mu gace ka Bria, bugamije gufasha guhangana n’indwara ya Malaria no gutanga inkunga mu rwego rw’uburezi.
Iki gikorwa cyabaye ku wa Gatanu tariki ya 9 Ugushyingo 2024. aho ubukangurambaga bwakorewe abaturage bo mu gace ka Bria, kari mu ntara ya Haute Kotto muri Centra Africa.
Col Dr. Theogene Rurangwa uyoboye itsinda ry’abaganga ba RDF bari mu gace ka Bria muri Centrafrique, yavuze ko uretse kuba izi ngabo zirinda umutekano w’abaturage, ariko zinashyize imbere kubigisha kugira imibereho myiza.
Ingabo z’u Rwanda zigishije abaturage barimo abakobwa n’abahungu, uburyo bwo kwirinda indwara ya Malaria harimo gukoresha imiti irinda iyi ndwara, kwita ku isuku mu ngo zabo hagamijwe guhangana n’indwara ya Malaria yugarije cyane uturere twa Centrafrique.
Nyuma y’ubukangurambaga, Ingabo z’u Rwanda zatanze ibikoresho by’ishuri birimo amakaye n’amakaramu ku banyeshuri 145 biga mu Ishuri ribanza rya Saint Florent Koyassi.
Iyi nkunga yatanzwe hagamijwe gufasha abanyeshuri gukomeza amashuri yabo, no kubongerera ubushobozi bwo kwiga no kugera ku ntego zabo z’uburezi, ni mu gihe hakomeje kuba imbogamizi zitandukanye mu rwego rw’uburezi mu gace ka Bria.
