U Rwanda rwakiriye icyiciro cya kabiri cy’abarimu 143 baturutse muri Zimbabwe, baje gutanga umusanzu muri gahunda yo kuzamura ireme ry’uburezi, mu rwego rw’ubufatanye hagati y’ibihugu byombi.
Aba barimu bageze mu Rwanda ku mugoroba wo ku Cyumweru, tariki ya 22 Ukuboza 2025.
Baje basanga abandi 157 baje mu cyiciro cya mbere, baje gutanga umusaruro mu mashuri y’u Rwanda, arimo Nderabarezi (TTCs), ay’imyuga n’ubumenyi ngiro (TVET), Kaminuza y’u Rwanda n’andi mashuri akenera abarimu bafite ubunararibonye mu rurimi rw’Icyongereza.
Uru rwego rw’ubufatanye rushingiye ku masezerano u Rwanda na Zimbabwe byasinyanye mu Ukuboza 2022, agamije guteza imbere imikoranire mu burezi no guhererekanya ubumenyi n’ubunararibonye hagati y’impuguke zo mu bihugu byombi.
Aya masezerano akomoka kuyandi yasinywe ku wa 23 Ukuboza 2021, yashyizeho umusingi wo kohereza abarimu b’Icyongereza bo muri Zimbabwe kugira ngo bafashe mu kongera ireme ry’imyigishirize no kuzamura ubushobozi bwo gukoresha Icyongereza mu nzego zitandukanye z’uburezi mu Rwanda.
Ibiro bishinzwe Abinjira n’Abasohoka muri Zimbabwe byatangaje ko uru rugendo rwateguwe neza kandi rukurikije amategeko, hagamijwe ko abarimu bagira urugendo rutekanye kandi rutabangamiye inshingano zabo.
Abayobozi bo muri Zimbabwe bagaragaje ko kohereza abarimu mu Rwanda ari amahirwe ku barimu ku giti cyabo, kuko bibafasha kwagura ubumenyi n’ubunararibonye ku rwego mpuzamahanga, no gutanga umusanzu mu kubaka ubufatanye bw’Afurika bushingiye ku gusangira ubumenyi.
Kwakira aba barimu biri mu ntego zo gushora imbaraga mu burezi bufite ireme, binyuze mu bufatanye mpuzamahanga bufasha kubaka ubushobozi bw’abakozi no guteza imbere ireme ry’amasomo.
Abarimu bo muri Zimbabwe bamaze igihe mu Rwanda bashimirwa uruhare bagize mu kuzamura ireme ry’imyigishirize n’imyigire, by’umwihariko mu nzego zikeneye Icyongereza nk’ururimi rukoreshwa mu myigishirize.
Iyi mikoranire ikomeje kugaragazwa nk’urugero rwiza rw’ubufatanye bw’Afurika bugamije kwishakamo ibisubizo by’iterambere rirambye, binyuze mu guteza imbere ubumenyi, ubushobozi bw’abakozi n’ireme ry’uburezi.
