Minisitiri w’umutekano mu gihugu, Dr Vincent Biruta yibukije aba polisi ko ubunyamwuga bwabo, ndetse n’ubwitange mu kazi, byagize uruhare mu kuba u Rwanda ari igihugu gifite umutekano, aboneraho kubasaba kurangwa n’imyitwarire myiza.
Ibi Minisitiri Biruta yabigarutseho ku wa kabiri, tariki ya 12 Ugushyingo, mu muhango wo gutangiza ku mugaragaro inama nkuru ya Polisi yiga ku ngamba n’imikorere yayo, yateraniye ku cyicaro gikuru cya Kacyiru.
Iyi nama kandi yitabiriwe n’Umuyobozi Mukuru wa Polisi y’u Rwanda CG Felix Namuhoranye, n’abandi bayobozi batandukanye b’uru rwego, ndetse n’urwego rukuru rushinzwe imiyoborere no gufata ibyemezo rutanga umurongo ngenderwaho mu kuzuza inshingano za Polisi.
Minisitiri Biruta yagarutse ku bunyamwuga n’ubwitange Polisi y’igihugu igira mw’iterambere ry’abaturage no gucunga umutekeno w’igihugu.
Ati” Polisi y’igihugu cy’u Rwanda igaragara mu nzego zishinzwe ubutabazi nk’umwuzure, inkongi y’umuriro n’impanuka zo mu muhanda”, ndetse akomeza ashimangira ko “guverinoma y’u Rwanda izakomeza kubatera inkunga mu bikorwa mukomeza gukora.”
Minisitiri Biruta yaboneyeho gutanga inama avuga ko hari aba polisi bakuru bagendera mu nzira nziza yo kubungabunga indangagaciro y’ubunyamwuga mu byo bakora, ariko anabibutsa ko hari bamwe muri bo batahisemo inzira nk’iyabo ahubwo bakarangwa n’imyitwarire mibi.
Yakomeje avuga ko abaranzwe n’imyitwarire mibi, n’ikinyabupfura gike byabavireyemo gufungwa abandi barirukanywa.
Yijeje aba bapolisi ko Guverinoma y’u Rwanda izakomeza gushyigikira Polisi y’u Rwanda mu iterambere ryayo, harimwo kuyishakira ibikoresho bigezweho, guhabwa amahugurwa n’ibindi bizamura ubunyamwuga.
Umuyobozi Mukuru wa Polisi y’u Rwanda CG Felix Namuhoranye nawe yongeyeho ko Polisi y’u Rwanda izakomeza kwita ku mutekano w’abantu n’ibintu himakazwa ubunyamwuga, by’umwihariko muri izi mpera z’umwaka aho usanga abantu bahurira mu birori n’ahandi bateranira ari benshi hakenerwa umutekano.
Akazi ka Polisi gasaba ubumenyi n’ubushobozi byihariye kugira ngo ibashe guhangana n’ibibazo by’umutekano bitandukanye, akaba ariyo mpamvu isabwa gukorwa neza kuko igira uruhare mu mutekano w’Igihugu muri rusanjye.
