Claver Ntoyinkima usanzwe ari Umuyobozi w’ibikorwa by’ubukerarugendo muri Pariki ya Nyungwe, yahawe igihembo mpuzamahanga, ashimirwa ibikorwa bye by’indashyikirwa mu kurengera inyoni no guteza imbere ubukangurambaga ku byerekeye ibidukikije.
Iki gihembo Ntoyinkima yatsindiye gitangwa n’u Bwongereza, ku bufatanye na Tusk Conservation Award, hagamije kurengera ibidukikije, akaba azashyikirizwa kumugaragaro n’Umwami w’u Bwongereza, Charles III, tariki ya 27 Ugushyingo 2024.
Ntoyinkima umaze imyaka myinshi yigisha abantu ku nyoni zo muri Nyungwe, ndetse afite uburyo bushya akoresha amajwi y’inyoni mu kwigisha ba mukerarugendo.Â
Mu museso, agana ishyamba gufata amajwi y’inyoni akoresheje ibikoresho byabugenewe, akazayifashisha mu kongerera ba mukerarugendo ubumenyi ku buzima bw’ibidukikije.Â
Ntoyinkima yashinze koperative ebyiri, aho avuka mu Murenge wa Rangiro, mu karere ka Nyamasheke. Imwe ni iyabahoze ariba rushimusi ndetse n’abangizaga Parike ya Ngungwe bahiga inyamaswa, mu gihe indi ni ari abafasha ba mu kerarugendo gutwara imizigo batembera mu ishyamba.
Igihembo cya Tusk Conservation kizagendana n’inkunga y’amafaranga angana na 30,000 £ (arenga miliyoni 51 z’amafaranga y’u Rwanda).
Igihembo yahawe ni igikomeye cyo kumushyigikira muri gahunda ye yo kurengera ibidukikije no guteza imbere ubukerarugendo burambye.
