Ku mugoroba wo ku wa mbere, tariki ya 25 Ugushyingo 2024, Arkiyepiskopi wa Kinshasa, Cardinal Fridolin Ambongo ari kumwe na Antoine Cardinal Kambanda bayoboye igitambo cya misa cyabereye muri Chapelle ya Saint Paul, i Kigali.
Cardinal Fridolin Ambongo ari mu ruzinduko mu Rwanda kuva tariki ya 25-28 Ugushyingo, aho yitabiriye inama ya Komite y’lhuriro ry’Abepiskopi Gatolika muri Afurika (SCEAM/SECAM)
Amakuru dukesha IGIHE, ni uko ku mugoroba wo kuwa mbere, Cardinal Ambongo yifatanyije na Antoine Cardinal Kambanda, uyobora Arkidiyosezi ya Kigali n’abandi basenyeri bitabiriye iyi nama, mu gitambo cya Misa yo kubakira, cyabereye kuri Chapelle ya Saint Paul.
Cardinal Ambongo usanzwe ari umuyobozi wa SCEAM yashimiye uko bakiriwe mu Rwanda, avuga ko Komite y’Ihuriro ry’Abepiskopi nyafurika yateraniye mu Rwanda mbere y’umwaka ngo inama ya SCEAM ibe.
Ati” Hari abibaza ngo kuki twaje i Kigali aho kujya ahandi? Turi aha i Kigali dutegura kwizihiza Inama Nkuru ya SCEAM izabera aha i Kigali umwaka utaha. “
Ubusanzwe inama ya SCEAM iyo ibura umwaka umwe ngo ibe, abagize Komite y’iri huriro bahurira mu gihugu cyizayakira, nk’uko byanagarutsweho na Cardinal Ambongo.
Ati” Mu muco wa SCEAM, umwaka ubanziriza iyo nama, Komite ihoraho mu mwaka ubanza iteranira mu gihugu kizayakira. Ni umwanzuro wa Komite kugenzura niba ibyangombwa byose byuzuye ngo iyo nama izaba umwaka utaha ibere aha. Iyo hari ibitameze neza, Komite ifata umwanzuro wo kwimurira iyo nama ahandi.”
Arkiyepiskopi wa Kinshasa, Cardinal Fridolin Ambongo yirinze kugira icyo avuga ku mubano w’u Rwanda na Repubulika Iharanira Demokarasi ya Congo, utameze neza, ahubwo ahamya ko icyo bashyize imbere ari uko inama ya SCEAM yazagenda neza.
Iyi nama yitabiriwe n’abihayimana Gatolika, baturutse mu bihugu nk’u Rwanda, RDC, Nigeria, Algeria, Madagascar, Namibia, Ghana, Tchad, Kenya na Mozambique.
