Mu Ntara y’Iburasirazuba , imirimo yo kubaka uruganda rw’amazi ‘ Muhazi Water Supply System’ ku batuye uturere twa Gatsibo na Kayonza, irarimbanyije
Uru ruganda ruzatanga amazi ku baturage 548,594, barimo abo mu Mirenge ya Murundi, Rukara na Gahini mu Karere ka Kayonza n’abandi bo mu Mirenge itanu yo mu Karere ka Gatsibo ari yo Kiramuruzi, Kiziguro, Murambi, Remera na Rugarama.
Uru ruganda ruhuriweho n’uturere tubiri , uru ruri kubakwa ku nkengero z’ikiyaga cya Muhazi ndetse isoko y’amazi yarwo ni iki kiyaga, biteganywa ko ruzajya rutunganya Meterokibe12,000 ku munsi, imirimo yo kubaka ahazatunganyirizwa amazi n’imiyoboro izayageza ku baturage igeze kure mu gice cy’uyu mushinga cya mbere.
Kugeza ubu hakozwe imiyoboro y’amazi ireshya n’ibirometero 256, ibigega 11 bizajya bibika amazi , ndetse n’amavomero rusange 165, ibi bikazafasha abaturage kubona amazi meza hafi y’aho batuye.
Kugeza ubu, Akarere ka Gatsibo kari ku ijanisha rya 86.7% mu gukwirakwiza amazi meza mu baturage.
Biteganyijwe ko igice cya mbere cy’imirimo yo kubaka uruganda rwa Muhazi rutunganya amazi meza cyizuzura gitwaye ingengo y’imari ingana na miriyari 19,459,810,234 z’amafaranga y’uRwanda, kikazuzura taliki ya 31 Werurwe 2026.
