François Gihoza Mivugo, ushinzwe ishyirwa mu bikorwa ry’imishinga mu Kigo cy’Igihugu gishinzwe iterambere ry’Ubwikorezi, RTDA, yasobanuye ibigenderwaho kugirango umuhanda wemerwe ko wujuje ibisabwa.
Ubwo yari mu kiganiro na RBA, Francois Gihozo Mivugo yagaragaje ko ireme ry’umuhanda wubakwa rituruka mu nyigo yawo yakozwe neza.
Ati” Iyo imishinga y’imihanda iyo inyigo itakozwe neza biragoye ko umuhanda uzamara igihe, nukuvuga ngo ibyiza by’umuhanda, uhura mbe, uburyo uzakomera bihera mu nyigo.”
Yasobanuye ko inyigo ubundi igaragaza neza aho umuhanda uzanyura, ibikoresho bizakoreshwa, aho bizaturuka n’ibindi bigomba kugaragazwa neza kugirango rwiyemezamo azoroherwe no gushyira mu bikorwa iyo nyigo.
Yakomeje agaragaza ko ubugenzuzi bwo kubaka bukorwa mu buryo butatu, aho Rwiyemezamirimo aba agomba kugenzura ibyo ari kubaka, yabona bimeze neza agashyikiriza iyo raporo Umuyobozi ukuriye uwo mushinga, nawe agakora isuzuma niba nta kibazo kigaragara mu byakozwe.
Iyo ibi birangiye, RTD, ikora ubugenzuzi bwayo aho isura imihanda, ikayikorera isuzuma hifashishijwe ibikoresho bya laboratwari, ibipimo byagaragaza ko umuhanda unoze, hagakurikiraho kuwumurika.
Francois Gihozo Mivugo yagaragaje ko iyo umuhanda umaze kumurikwa rwiyemezamirimo atanga garanti iri hejuru y’amezi 12 kugeza kuri 18.
