Umuvugizi wa Polisi y’u Rwanda, ACP Rutikanga Boniface yijeje Abanyarwanda umutekano usesuye mu bikorwa bitandukanye bazitabira bisoza umwaka.
Ni ibyo yagarutse kuri uyu wa Kane, ubwo yari mu kiganiro na RBA, avuga ko Polisi y’u Rwanda, umwaka ku w’undi igenda irushaho kunoza ibijyanye no kubungabunga umutekano w’abantu n’ibintu mu minsi isoza umwaka.
Ati” Hari icyo tugenda twiyunguraho. Urugero, iyo urebye imyiteguro y’uburyo abantu bazataha bajya mu minsi mikuru, bitandukanye n’umwaka ushize. Habayeho ikibazo cy’umuvundo. Uyu mwaka rero twiteguye neza.”
Ni mu gihe hari hashize iminsi micye Urwego Ngenzuramikorere, RURA, rutangaje gahunda igenga ingendo zijya mu ntara mu minsi isoza umwaka, kuko byagaragaye ko muri ibi bihe haba umuvundo byumwihariko muri Gare ya Nyabugogo.
Mu korohereza abajya n’abava mu ntara bakoresha imodoka rusanjye kuva ku wa 23-24 Ukuboza 2024 no ku wa 30-31 Ukuboza 2024, abajya mu ntara y’Amajyepfo bazajya bafatira imodoka i Nyamirambo kuri Pele Stadium.
Abajya mu Burasirazuba bazafatira imodoka muri Gare ya Kabuga, abajya mu Majyaruguru ni muri gare ya Nyabugogo naho abajya Bugesera ni muri gare ya Nyanza, Kicukiro.
ACP Rutikanga yavuze ko muri iyi minsi mikuru hashyizweho aba polisi benshi hirya no hino mu gihugu, bazaba bacunga umutekano, bitewe nuko hateganyijwe ibikirwa byinshi byiganjemo iby’imyidagaduro bizahuriramo abantu benshi.
