Perezida Paul Kagame yahaye umukoro Minisitiri mushya wa Siporo, Nelly Mukazayire, agaragaza ko siporo yo mu Rwanda igomba kuba ubucuruzi bushingiye ku mpano aho kuba ari uburyo bwa bamwe bwo gushaka amikoro.
Ni ibyo Perezida Kagame yagarutseho ubwo yakiraga indahiro za Minisitiri mushya wa Siporo, Nelly Mukazayire, umunyamabanga wa Leta muri Minisiteri ya Siporo, Rwego Ngarambe n’Umunyamabanga wa Leta ushinzwe Imari muri Minisiteri y’Imari n’Igenamigambi, Godfrey Kabera.
Perezida Kagame yavuze ko siporo y’u Rwanda itagomba kuba uburyo bwo kubona amikoro, ahubwo igomba gukorwa nk’ubucuruzi bushingiye ku mpano zabayikora.
Ati” Mubyo [Siporo] igeza ku bantu havemo n’amikoro. Ubu siporo ni ubucuruzi bushingiye ku mpano mu Banyarwanda cyangwa mu bandi ahandi. Iyo mpano rero hari uburyo icuruzwa, hari uburyo ivamo amikoro. Ni yo ntego yacu.”
Perezida Kagame yongeye kwibutsa abayobozi bashyizweho muri Minisiteri ya Siporo, guharanira ko itanga umusaruro, bigendanye n’ishoramari rigaragara ryakozwe mu kubaka ibikorwa remezo.
Umukuru w’Igihugu yibukije abayobozi bashya kuzuza neza inshingano bahawe, avuga ko hari Abanyarwanda benshi bakora iyo mirimo, bityo abatoranyijwe batagomba gushaka impamvu yo kutubahiriza imirimo.
Yongeyeho ko hari abavuga ko bashyizwe mu mirimo ariko ntibahabwe amikoro, yerekana ko amikoro igihugu gifite adahagije, atarangiza imirimo yose, bityo abayobozi ari umukoro wabo gukora neza inshingano bahawe zirimo no gushaka ayo mikoro.
Ati “Mwe mugiye gukorera Guverinoma mumenye ko muje mu nshingano mwabwiwe, mwemeye, muzi, ariko muri izo niba batababwiye ko hiyongereyemo gushaka amikoro ntabwo byari byuzuye.”
